DILI, STLTIMORLESTE.com – Pasiente raan midar lamenta aimoruk laiha iha Hospital Nasional Guido Valadraes (HNGV), obriga sira sosa iha apotik ka buka meius rasik.
Pasiente raan midar, Miguel Fernandes hatete, nia sente triste bainhira mai konsulta, maibé bainhira atu foti aimoruk iha farmásia HNGV, funsionáriu hatete aimoruk ba ran midar laiha no haruka nia ba sosa iha apotik.
Nia dehan, problema sai todan liu bainhira apotik sira mós laiha aimoruk ne’ebé presiza. Tanba nee, pasiente sira ne’ebé iha koñesimentu kona-ba ai-moruk tenke buka rasik meius tradisionál, enkuantu sira ne’ebé la hatene bele hein deit.
Miguel hatete, nia sofre moras raan midar tinan 10 liu ona, no kada fulan mai halo kontrolu iha HNGV. Maibé, problema aimoruk laiha nee akontese beibeik ona durante tinan tolu ka haat liu bá.
“Aimoruk laiha nee laos foin akontese, maibé iha kedas tinan tolu no haat liu ba. Dala ruma hau mai aimoruk iha, maibé dalan seluk mai aimoruk laiha. Dala ruma fulan rua to’o tolu aimoruk laiha, entaun fila ba uma no daan aitahan moruk sira atu hemu,” dehan Miguel ba jornalista iha HNGV, Segunda (24/08/2026).
Nia dehan, bainhira aimoruk disponivel, pasiente sira bele kontinua hemu tuir orientasaun médiku. Maibé, bainhira aimoruk hotu, nia tenke fila ba uma no buka aimoruk hanesan alternativa.
Miguel apela ba Governu atu fó prioridade ba disponibilidade aimoruk iha hospitál, tanba pasiente sira, aimoruk mak parte importante atu kontrola moras no salva vida.
Nia hatete, investimentu iha infraestrutura no dalan importante, maibé disponibilidade aimoruk ba pasiente sira mós tenke sai prioridade.
“Governu bele halo infraestrutura boot no halo dalan aspal, maibé ema moras presiza aimoruk atu hemu hodi salva vida. Dalan bele aat, maibé aimoruk ba ema moras tenke iha,” nia dehan.
Nia konsidera, falta aimoruk sai problema boot ba povu, liu-liu ba pasiente ho moras kroniku ne’ebé presiza hemu aimoruk regularmente.
Pasiente seluk, Terezinha de Fatima mós relata esperiénsia hanesan. Nia dehan bainhira mai konsulta iha HNGV, dala ruma aimoruk laiha no pasiente tenke sosa iha apotik.
“Dala ruma mai konsulta aimoruk iha, fulan oin mai fali aimoruk nee laiha ka hotu. Entaun ami tenke ba sosa fali iha apotik sira,” dehan Terezinha.
Terezinha rekomenda ba Governu atu rezolve uluk problema stok aimoruk iha ospitál sira, tanba pasiente ho moras ran midar presiza aimoruk kontinua atu kontrola sira-nia kondisaun.
Enkuantu, membru família pasiente, Anastasia Gomes, hatete problema falta aimoruk laos akontese deit iha HNGV, maibé mós iha sentru saúde sira.
Nia dehan, pasiente sira dala barak mai halo konsulta no fila ho liman mamuk tanba aimoruk laiha. Sira ne’ebé iha osan bele ba sosa iha apotik, maibé sira ne’ebé laiha osan tenke fila ba uma no buka alternativa seluk.
“Balun tanba tauk ba sira-nia moras no hadomi sira-nia isin, sosa aimoruk fali iha apotik. Maibé sira ne’ebé laiha osan la sosa, fila ba uma buka meius seluk no uza aimoruk tradisionál,” dehan Anastasia.
Nia husu ba Governu atu rezolve lalais problema stok aimoruk ne’ebé dala barak hotu, no asegura katak ospitál no sentru saúde sira iha aimoruk sufisiente ba pasiente sira.
(dom)
