DILI, STLTIMORLESTE.com – Konsumidor sira manifesta preokupasaun boot kona-ba seguransa no kualidade ai-haan, liu liu hafoin imajen konaba ayam potong (manu karna) ho kor metan neebe viral iha facebook. Kondisaun produtu nee iha indikasaun katak liu ona prazu validade, hodi hamosu diskusaun makaas iha publiku no husu Governu ka Autoridade sira atu halo fiskalizasaun rigorozu ba produtu alimentar sira iha merkadu.
Imajen neebe viral nee hatudu ayam potong (manu karna) neebe ho kor metan, indikasaun ida katak produtu nee bele estragadu ona ka la kumpri padraun armazenamentu neebe seguru.
Konsumidor sira sente tauk tanba ayam potong (manu karna) neebe rai iha kondisaun neebe la seguru, bainhira konsumu bele lori risku boot ba moras.
Aleinde ida nee mos fator eletrisidade neebe mate lakan beibeik fo impaktu negativu ba kualidade ayam potong (manu karna), tanba temperatur freezer labele mantein estavel hodi halo produtu sira sai kor metan no estraga.
Kazu ida nee hatudu katak kualidade stok ayam potong iha merkadu, presiza hetan kontrolu neebe diak liutan husi parte distributor sira.
Tuir Observador Ekonomia, Jose de Oliveira katak, kazu ayam potong ( manu karna) neebe haree metan nee laos deit perigu ba saude publiku, maibe mos reprezenta falha ida iha sistema distribuisaun no fiskalizasaun merkadu nian.
“Hanesan observador, hau haree katak fan produtu neebe kor muda ona (metan) nee, pratika komersial neebe kontrariu ho etika no viola direitu fundamental konsumidor nian, atu hetan aihan neebe seguru,”dehan Jose ba STL, Sesta nee (05/06/2026).
Nia hatutan, situasaun nee labele husik hakmatek. Governu liu husi Ministeriu relevante sira tenke foti medida disiplinar, ba operador komersial sira neebe ho neon hakat liu tiha regra sanitaria sira.
Protesaun ba konsumidor nuudar prioridade neebe Governu tenke asegura, tanba saude publiku mak rikusoin boot liu neebe labele troka ho lukru negosiu nian neebe la kumpri kualidade.
Nunee mos imajen ayam potong metan nee hetan reasaun makas husi netizen sira, ho komentariu barak neebe ezije Governu liu husi AIFAESA (Autoridade Inspesaun Fiskalizasaun Atividade Ekonomia Sanitaria no Alimentar) sira atu foti asaun lalais.
Publiku preokupa se ida nee akontese ba manu karna (ayam potong), karik iha mos produtu seluk neebe liu prazu ka estraga hela iha merkadu neebe seidauk detetadu.
Komentariu husi konsumidor sira hatudu katak sira sente lakon konfiansa ba kualidade produtu sira neebe tama ba merkadu, tanba faan sasan neebe kor muda ona (metan) hamenus tebes konfiansa publiku nian.
Iha komentariu sira nee kosumidor barak husu atu Governu halo fiskalizasaun neebe rigorozu ba loja sira faan aihan ka produtu neebe liu ona prazu, no balu husu atu publiku mos tenke matan moris bainhira sosa sasan iha merkadu, hodi evita risku ba saude familia nian.
Entretantu imajen ayam potong (manu karna) metan neebe hamosu preokupasaun publiku nee komesa sirkula no viral iha rede sosial Facebook, neebe hamosu debate oioin husi utilizador sira konaba kualidade aihan iha merkadu.
(car)
