DILI, STLTIMORLESTE.com —Kontrolu fraku iha karaoke no otelaria bele hamosu risku atividade ilegal, tanba ne’e akademista sira husu Servisu Migrasaun atu hametin fiskalizasaun ba sidadaun estranjeiru.
Operasaun rutinária husi ekipa Migrasaun iha Dili hala’o atu verifika kumprimentu ba Lei Migrasaun no Azilu, inklui indikasaun kona-ba utilizasaun visa turista atu hala’o servisu sem autorizasaun.
Akademista UNPAZ, Antonio da Silva subliña katak, kontrolu iha fatin públiku no rekreativu importante atu mantein estabilidade no garante ambiente seguru ba komunidade.
“Kontrolu ne’ebé metin iha fatin públiku no fatin rekreativu sira sai prioridade, tanba kontribui ba estabilidade no kria ambiente seguru ba ema hotu iha Dili.” dehan Antonio ba STL, iha Largo Lecidere, Dili, Segunda (12/10/2026).
Nia hateten katak, fiskalizasaun tenke bazeia ba lei no hala’o ho konsisténsia, hodi defende soberania Estadu nian no proteje merkadu servisu lokál husi violasaun legal.
Iha fatin hanesan Observadór polítika, Daniel de Oliveira mós subliña katak, operasaun hanesan ne’e presiza koordinasaun di’ak entre instituisaun estadu sira atu garante aplikasaun lei ne’ebé efetiva.
“Konsisténsia iha fiskalizasaun la’ós de’it kona-ba aplika lei, maibé mós oinsá Estadu hatudu nia prezensa no autoridade atu garante seguransa públika no ordem nasionál.” dehan Daniel.
Daniel hatutan katak, transparénsia no akontabilidade iha aplikasaun lei migrasaun bele hamenus espekulasaun, no hametin konfiansa públika ba autoridade kompetente sira.
Entretantu iperasaun ne’e hala’o tanba iha indikasaun kona-ba posibilidade estranjeiru balu uza visa turista atu hala’o atividade servisu ka komersiál ne’ebé la tuir kondisaun visa. Prosesu verifikasaun sei kontinua atu determina se iha violasaun regra migrasaun.
Servisu Migrasaun afirma sei kontinua hala’o kontrolu no inspesaun ho profisionalizmu, responsabilidade no respeitu ba lei, hodi promove migrasaun ne’ebé ordenada no seguru.
Governu liu husi Ministeriu relevante apela ba komunidade atu fó informasaun se iha indikasaun kona-ba estranjeiru ne’ebé suspeitu viola lei, inklui utilizasaun visa turista ba servisu, prostituisaun ilegal, tráfiku umanu ka eksplorasaun.
Kooperasaun entre komunidade no autoridade kompetente konsidera importante atu hametin kontrolu migrasaun no prevene atividade ne’ebé kontra lei iha Timor-Leste.
Bazeia ba informasaun ne’ebé Servisu Migrasaun publika, ekipa operasaun konsege identifika no asegura sidadaun estranjeiru feto na’in 16 iha fatin oioin. Prosesu identifikasaun no verifikasaun kontinua hala’o.
(car)
