DILI, STLTIMORLESTE.com – Graduadus sira husu atu iha oportunidade no kampu servisu ne’ebé adekuadu ba joven sira ne’ebé remata ona estudu iha ensinu superiór.
Afonso Martins da Costa, graduadu husi UNPAZ, fakuldade Ekonomia hatete ba STL iha edifísiu Ministériu Edukasaun, Tersa-feira (22/09/2026), katak joven barak remata ona estudu, maibé balun seidauk hetan servisu.
Nia husu atu iha kondisaun ne’ebé bele loke oportunidade servisu ba joven sira ne’ebé remata ona estudu iha ensinu superiór.
“Ita haree katak, bainhira iha vaga ruma ema fó sai, ita nia joven barak mak konkore vaga refere. Maibé, ne’e depende ba ema ida-idak nia oportunidade, tanba dala ruma vaga sira presiza ema uitoan deit,” dehan Afonso.
Nia hatete katak, joven feto no mane ne’ebé remata ona estudu, balun seidauk hetan servisu no balun konkore oportunidade servisu iha rai liur, inklui Austrália no Coreia, tanba oportunidade servisu iha rai laran limitadu.
“Hau remata estudu iha 2023. Durante ne’e, bainhira hau asesu informasaun kona-ba vaga ruma, hau hatama kedas dokumentus, maibé la liu, tanba ema barak mak hatama dokumentus. Depois vaga refere presiza ema na’in haat ka lima nune’e,” dehan nia.
Enkuantu ne’e, Prezidente João Saldanha University ou Institute, João Mariano Saldanha hatete katak, presiza loke kampu servisu ba graduadus sira ne’ebé remata ona sira nia estudu iha universidade.
Nia dehan, universidade iha responsabilidade atu prepara graduadus sira ho kapasidade ne’ebé bele kompete iha merkadu servisu, maibé oportunidade servisu mos presiza aumenta.
(jac)
