ERMERA, STLTIMORLESTE.com — Jurista Sergio Dias Quintas husu Konsellu Superiór Majistratura Judisiária (KSMJ) atu halo verifikasaun no fó klarifikasaun kona-ba polémika prosesu Primeiru Interrogatóriu iha Tribunal Dili.
Sergio dehan, KSMJ presiza haree kestaun ne’e, tanba polémika ne’ebé espalha iha media sosial no media hamosu espekulasaun no preokupasaun públiku.
Nia husu KSMJ atu halo verifikasaun ba prosedimentu ne’ebé akontese, hodi determina se iha infrasaun ruma ka lae.
“Hau nia hanoin, KSMJ tenke buka hatene no se presiza hasai deliberasaun hodi haruka halo instrusaun ba prosesu,” dehan Sergio.
Sergio hateten, kada fulan juízes sira iha lista pikete ba prosesu urjente, inklui Primeiru Interrogatóriu no prosesu sumáriu.
Bainhira juíz ida hetan turnu pikete no prosesu distribui ba nia, juíz refere iha kompeténsia atu jere prosesu tuir lei.
Tuir nia, la iha ema seluk ne’ebé bele manda ka orienta juíz kona-ba desizaun judisiál, tanba prinsipiu independénsia majistradu.
Nia refere ba Artigu 6 Estatutu Majistradu Judisiál, ne’ebé hatete majistradu independente no julga tuir lei no Konstituisaun.
Numeru 2 hosi artigu refere hatete independénsia majistradu judisiál manifesta iha ezersísiu funsaun hodi julga tuir jestaun ba prosesu.
Iha parte seluk, akadémiku Universidade Nasionál Timor Lorosa’e (UNTL), Rafael de Jesus husu KSMJ atu haree ho rigor ba preokupasaun ne’e, hodi prevene situasaun hanesan akontese tan.
“KSMJ iha kompeténsia atu haree kestaun ne’e, hodi labele hamosu preokupasaun iha públiku,” dehan Rafael de Jesus.
Rafael hatutan katak, autoridade judisiária sira presiza halao knaar tuir lei, hodi sistema judisiáriu bele lao ho diak.
Nia mos konsidera katak autoridade kompetente presiza fó klarifikasaun kona-ba prosedimentu no independénsia iha prosesu judisiáriu.
Kestaun kona-ba Primeiru Interrogatóriu ne’e sai atensaun públiku, ho pedidu ba autoridade kompetente atu fó klarifikasaun.
(ter)
