DILI, STLTIMORLESTE.com – KSTL prepara protestu iha Dili kontra governu kona-ba suspensaun prosesu revizaun salariu minimu iha Timor-Leste.
Prezidente Konfederasaun Sindikatu Timor-Leste (KSTL), Almerio Vila Nova hatete, organizasaun sei halo konferensia imprensa.
Nia hatete, KSTL sei mobiliza trabalhador sira atu protesta hasoru governu kona-ba prosesu salariu minimu.
Almerio kritika deklarasaun Visi-Primeiru Ministru, ne’ebé mos Ministru Koordenasaun Asuntu Ekonomia (MKAE), kona-ba kestaun salariu minimu.
Nia konsidera, deklarasaun governu nian bele hatudu falta kompromisu atu kria kondisaun dignu ba trabalhador sira.
KSTL konsidera salariu minimu nu’udar instrumentu importante atu proteje trabalhador vulneravel no prevene sira monu ba liña pobreza.
“Objetivu salariu minimu mak proteje trabalhador vulneravel no garante rendimentu dignu ba sira,” dehan Almerio ba STL ihá nia knar fatin Bemori, Segunda (21/09/2026).
Nia hatete prosesu revizaun salariu minimu iha baze legal, inklui Lei Númeru 4/2012, Artigu 100.
Tuir lei ne’e, Conselho Nacional do Trabalho (CNT) iha kompetensia atu propoin montante salariu minimu ba Konsellu Ministru.
CNT kompostu husi reprezentante governu, empregador no trabalhador, ho SEFOPE, CCI-TL no KSTL.
Almerio hatete prosesu CNT envolve peskiza kona-ba moris komunidade, folin sasan, rendimentu no kondisaun ekonomia.
Peskiza envolve mos peritus ekonomia, Ministério Finansas, Estatístika no ministeriu kompetente sira.
Nia hatete proposta salariu minimu liu ona prosesu diskusaun no hetan konkordansia husi reprezentante empregador sira.
“Ita prepara proposta nee ho tempu naruk, maibé governu kansela hela prosesu ne’e,” dehan Almerio.
Tuir Almerio, salariu minimu tenke reviza kada tinan rua, maibé prosesu revizaun la’o atrasadu desde tinan 2014.
Nia hatete, se revizaun hala’o regularmente, montante salariu minimu bele aas liu montante atual US$ 115.
Almerio konsidera salariu US$ 115 nia poder kompras tun tanba inflasaun no aumentu folin sasan durante tinan hirak.
“Iha tinan 14 la iha revizaun, salariu US$115 nia poder kompras tun ona signifikativu,” dehan Almerio.
Nia refere mos ba análize ILO iha 2021 kona-ba poder kompras salariu minimu iha rejiaun Ázia Sudeste.
Almerio hatete salariu minimu presiza ajusta ho inflasaun atu proteje poder kompras trabalhador sira.
Nia hatete proposta atual konsidera montante moderadu, tuir kondisaun ekonomia no kapasidade empregador sira.
“Salariu minimu justu, tuir ami nia haree, tenke liu US$250,” dehan Almerio.
KSTL mos hatete ona haruka karta ba Visi-Primeiru Ministru iha fulan Maiu atu diskute proposta salariu minimu.
Objetivu mak atu hetan desizaun kona-ba proposta antes Loron Mundial Trabalhador, maibé diskusaun ne’e seidauk realiza.
Almerio hatete KSTL haruka karta fali depois loron 1 Maiu, maibé seidauk hetan oportunidade atu hasoru MKAE.
Nia husu governu atu fó esplikasaun kona-ba razaun prosesu proposta dekretu-lei salariu minimu seidauk lori ba Konsellu Ministru.
“AMI hein oportunidade atu hasoru Visi-Primeiru Ministru no husu esplikasaun kona-ba prosesu ne’e,” dehan Almerio.
Tuir KSTL, salariu minimu ne’e la’ós obrigasaun governu atu selu trabalhador, maibé responsabilidade empregador sira.
Proposta dekretu-lei prevê aplikasaun salariu minimu ba setor privadu, kooperativa no sosial, la inklui funsionariu públiku.
KSTL hatete sei kontinua aproxima ho MKAE atu buka solusaun kona-ba prosesu revizaun salariu minimu.
Almerio konsidera responsabilidade politika no moral kona-ba prosesu ne’e agora iha responsabilidade MKAE.
Nia husu MKAE atu esplika ba trabalhador no públiku kona-ba razaun suspensaun prosesu revizaun salariu minimu.
KSTL mos argumenta empregador sira nia reprezentante iha CNT, CCI-TL, antes ne’e konkorda ho proposta ne’ebé CNT aprova.
“CCI-TL reprezenta empregador iha CNT no konkorda ho proposta, tanba ne’e prosesu tenke kontinua,” dehan Almerio.
Almerio mos hatete, trabalhador sira kontribui ba ekonomia nasional liu husi atividade produsaun, selu impostu no kontribuisaun sosial.
Nia konsidera trabalhador sira nia kontribuisaun tenke konsidera iha formulasaun politika salariu no proteksaun sosial.
KSTL planeia anuncia detallu kona-ba data no forma protestu iha konferensia imprensa ne’ebé sei realiza iha tempu besik.
(dom)
