DILI, STLTIMORLESTE.com – Kualidade profesor sira iha indikador barak atu avalia, liuliu kona-ba padraun kompeténsia ne’ebé estabelese ona iha Lei-Baze da Edukasaun no Sistema Nasionál Kompeténsia.
Diretor Ezekutivu TLCE, Jose Monteiro, hato’o asuntu ne’e ba STL, Kuarta-feira (07/10/2026), no hatete katak kualidade professor tenke haree husi aspetu oioin.
“Kualidade ne’e nia indikador barak atu avalia, kualidade professor haree ba aspetu oioin, liuliu padraun kompeténsia haat ne’ebé estabelese iha Lei-Baze da Edukasaun no Sistema Nasionál Kompeténsia,” dehan Jose Monteiro.
Nia esplika, padraun kompeténsia ne’e inklui kapasidade pedagójika, kapasidade akadémika, língua no kapasidade étika, ne’ebé professor sira presiza kumpre.
Tuir nia, maski iha professor balun ne’ebé kumpre ona balun husi kompeténsia hirak ne’e, sei iha aspetu balun ne’ebé presiza hadi’a, inklui dominasaun ba língua ofisiál.
“Importante liu agora mak professor sira hotu tenke iha kapasidade ne’ebé bele adapta ba mudansa globál. Ida ne’e importante, maibé dezafiu prinsipál mak ita seidauk iha kondisaun ne’ebé diak,” katak nia.
Iha fatin seluk, profesor husi EBF Fatumeta, Feliciano Gusmão hatete katak, atu hasa’e kualidade professor sira, Governu liu husi Ministériu Edukasaun (ME) kontinua fó formasaun.
“Hau hanoin atu hasa’e kualidade professor sira nian, ita-nia Governu liu husi ME hala’o formasaun ba ita-nia professor sira, atu nune’e bele aumenta sira-nia koñesimentu,” dehan Feliciano.
Entretantu, Diretor Escola ESTV-IT 28 de Novembro Becora-Díli, Tomás Pinto, la bele fó komentáriu kona-ba asuntu ne’e tanba nia iha viajem hela.
(jac)
