Kumpri Ona Tinan 5 Iha Prizaun, AC Hetan Liberdade Kondisional

Ilustrasaun (Foto: Espesial)

DILI, STLTIMORLESTE.com – Rekuzu ho inisial AC hetan liderdade kondisional husi Tribunal, tanba kumpri ona metade de pena husi kastigu neebe iha.

Antes Tribunal atu hasai mandadu libertasaun ba rekuzu ka kondenadu, iha sala julgamentu laran Juiz Prosesu Ana Paula husu ba rekuzu kona-ba saida mak rekuzu aprende iha prizaun, atu sai iha liur labele komete tan krimi neebe antes nee rekuzu komete.

Iha sala julgamentu laran, rekuzu deklara katak, durante iha prizaun aprende buat barak, liu husi formasaun kona-ba kontrola hirus, no lian Inglesh no mos kona-ba oinsa atu hadok aan husi Violasaun sira, no iha mos formasaun husi Padre sira kona-ba Jesus nia futar fuan santu, no hahi hanai ba Jesus.

Rekuzu deklara, sai iha liur sei kontrola aan atu hases aan husi buat neebe la diak liu-liu krime, tanba iha Prizaun laran aprende ona kona-ba saida maj diak, arepende tebes ba nia hahalok nee, no promete sai iha liur sei hadok aan husi krimi.

Rona tiha rekuzu, Tribunal mos deside hodi rona rekuzu nia kaben ho inisial S. Rekuzu nia kaben deklara, sente falta xefe familia banhira nia laen tama tiha kadeia, maibe prontu simu ho problema neebe akontese.

Rekuzu nia feen deklara, razaun simu rekuzu iha ida deit, tanba sira kazamentu iha Igreja no fiar ba juramentu neebe dehan, sei la soe o iha tempu susar no terus nia laran. No fiar tama iha kadeia durante tinan 5, nia kaben aprende ona buat barak, sai sei implementa iha sosiedade.

Deklara tan, se sai husi kadeia mak rekuzu kontinua halo krimi, ida nee signifika katak kastigu neebe durante nee rekuzu hetan seidauk todan. No durante nee sira sempre moris feliz, maibe ho aktu rekuzu nian lori tristeza boot ba familia, maibe konsidera ida nee hanesan ikus ona, lakohi mosu tan ba dala rua.

Rona tiha rekuzu ho nia kaben, ikus mai Prokurador Ozorio de Deus deklara, lei ezekusaun penal sita kona-ba kazu sira hanesan nee, liu husi avaliasaun relatoriu sosial rekuzu iha komportamentu diak bele hetan liberdade kondisional, maibe husu Tribunal tetu atu fo hanoin ba rekuzu, hodi re integra ba iha sosiedade labele mosu tan krimi refere.

Enkuantu rekuzu nia defeza, Agustinha de Olivera deklara, rekuzu hateten ona aprende buat barak iha prizaun, tanba nee tau konfiansa rekuzu sai iha liur sei implementa saida mak rekuzu aprende iha prizaun hodi labele akontese tan krimi.

No haree katak, rekuzu bele ona hetan liberdade kondisonal tanba prienxe ona regra neebe iha.

Rona tiha husi parte Prokurador no Defensor nian, ikus mai Juiz Prosesu Ana Paula deklara katak, rekuzu kompromete bazeia ba esperiensia iha prizaun sai hanesan lisaun ida, hodi bele ajuda atu prevene nia an ba hahalok ka krime sira neebe ho nia natureza seksual hodi koko hadok aan.

Tribunal deklara, rekuzu nia ferik oan mos fo hanoin katak, rekuzu nia pasadu bele ajuda rekuzu hodi sai ema foun, katak hadok aan husi hahalok hanesan nee iha futuru, tanba rekuzu hatene ona saida mak diak.

Tribunal fo oportunidade ba rekuzu atu bele komprova komitmentu neebe rekuzu halo ona, no apoiu husi rekuzu nia kaben Tribunal fiar sei hasoru desafiu sira.
Tribunal deklara, fo liberdade ba rekuzu tanba atinji ona metade da pena, ho razaun tenke mantein komportamentu diak, durante periodu halao liberdade kondisional.

Tribunal deklara tan, se durante liderdade kondisional halo fali krimi foun, sei fila fali ba iha kadeia hodi kumpri restu husi kastigu nee, ka kastigu ba krimi foun.

No ikus mai, Tribunal deside hasai mandadu libertasaun ba rekuzu, husu atu hatudu hahalok diak iha sosiedade.

Rekuzu tama iha prizaun, desizaun husi Tribunal ba rekuzu atu kumpri kastigu tinan 10. Rekuzu hahu tama iha prizaun iha loron 29 fulan Janeiru tinan 2020, no rekuzu kumpri ona metade de pena iha prizaun durante tinan lima. Tanba nee iha loron 29 fulan Janeiru tinan 2025 rekuzu hetan liderdade kondisional.

Prosesu ida nee fo sai husi Juiz prosesu Ana Paula, Ministeriu Publiku reprezenta husi Prokurador Ozorio de Deus, rekuzu akompana husi nia defeza, Agustinha de Olivera.

(ter)

Share it :

Leave a Reply

Your email address will not be published. Required fields are marked *