DILI, STLTIMORLESTE.com – Bainhira ekipa saude hakbesik aan no halo kurativu saude ba pasiente sira, liu-liu pasiente kankru sira neebe kbiit laek tenke uza ho apoiu husi governu.
Doutor Espesialista Kankru, Moizes Duarte Ataide dehan, iha pasiente kankru kroniku barak mak sira halo kurativu maibe balun husik ona mundu no balun mak koopera no agora sei iha hela. Hanesan pasiente kankru susun ho idade 73 agora sei iha, neebe nia parte ho ekipa sempre ba halo vizita no ba halo kurativu kuidadu pailativu iha pasiente nee nia uma.
Nunee mos ba pasiente ida neebe ho moras komplikadu diabetes no kankru kroniku makaas daudaun nee koopera fali ona, depois lori husi HNGV ba halo tratamentu husi kuidadu pailativu iha Hospital Lahane, no kontinua mai halo fali tratamentu iha uma no akompanha husi pesoal saude voluntariu kuidadu paliativu nian iha pasiente nia uma too kanek nee agora maran no diak, mezmu raan midar nee tun sae.
Tuir nia katak, bainhira atu ba halo kurativu ba iha komunidade, liu-liu pasiente kankru sira neebe kbiit laek tenke uza ho apoiu husi governu.
“Bainhira halo kuidadu paliativu ba iha komunidade, liu-liu ba ema sira neebe kbiit laek ho moras kankru sira nee tenke uza ho apoiu. Se hau ba deit, buat ida laiha mos la.diak,” dehan nia ba STL iha Komoro, Kuarta (05/08/2026).
Nia afirma, ohin loron Timor nee ema barak mak graduadu sai infermeira, parteira, doutora no saude publiku maibe servisu laiha. Buat neebe presiza halo mak atu rekruta ema sira nee hodi bele halo servisu saude nian hodi servi ba povu rai ida nee.
Nia haktuir, pasiente kankru susun difisil tebes atu kura ho diak liu, maibe mantein deit atu pasiente nia kanek nee moos, para labele infeksaun. Maibe nia kanek nee loron ba loron nia iis la taka aan, nia nafatin iis tanba kanek neebe dodok. Pasiente ida idade 73 nee konsege trata duni laos atu diak liu maibe ho nia kanek neebe iha mantein atu moos nafatin.
Pesoal Saude Voluntariu, Domingos Neves de Deus.husi Munisipiu Ermera hatete, nia parte kontente ho vokasaun servisu neebe hetan husi doutor hodi delega halo kurativu no akompanha pasiente moras diabetes no kankru iha sira nia hela fatin. Antes pasiente fila ba uma, sei halo kuidadu paliativu iha Hospital Lahane, tanba haree ba pasiente nia kondisaun diak oituan, entaun kontinua halo fali tratamentu iha uma too rekopera husi moras no kanek neebe pasiente nee sofre.
“Entaun hau tenke halo kurativu ba pasiente nee iha nia uma deit, tuir tipu no protokolu husi doutor sira. Husi estuda no halo koordenasaun ho doutor sira hanesan mos voluntariu, entaun ho esperiensia nee hau tenke implementa tuir saida mak hau hetan no iha. Too ohin loron ho grasa Maromak pasiente nee hetan rekoperasaun diak fila fali hanesan baibain,” dehan nia.
Nia hatete, atu ba voluntariu iha Hospital Lahane iha kuidadu paliativu nian, antes nee halao uluk estajiu iha HNGV hamutuk ho Doutor Moizes ho ekipa, momentu halao hela estudu iha Universidade Oriental Timor Lorosae. Depois remata estudu mak ba voluntariu fali iha Hospital Lahane hodi ajuda halo kurativu ba pasiente kankru sira.
Graduadu husi Unital nee dehan, ba fururu se karik seidauk hetan servisu hakarak nafatin voluntariu ba iha Hospital Lahane hodi ajuda halo kurativu ba pasiente sira, atu nunee konhesimentu no esperiensia neebe nia iha labele lakon.
(dom)
