DILI, STLTIMORLESTE.com – Reitor Universidade da Paz (UNPAZ) husu Governu dezenvolve kuríkulu nasionál ne’ebé halo balansu entre CPLP no ASEAN.
Reitor UNPAZ, Adolmando Soares Amaral hatete katak, Timor-Leste presiza adapta sistema edukasaun no kuríkulu nasionál ho realidade foun, tanba nasaun ne’e tama ona ASEAN, enkuantu kontinua sai membru Comunidade dos Países de Língua Portuguesa (CPLP).
“Timor-Leste tenke buka oinsa atu halo balansu entre CPLP ho ASEAN,” dehan Reitor UNPAZ, Adolmando Soares Amaral, Sesta (18/09/2026).
Nia esplika katak, kuríkulu edukasaun iha Timor-Leste durante ne’e barak adapta husi nasaun CPLP, inklui Portugal no Brazil, maibé, ho Timor-Leste nia prezensa iha ASEAN, sistema edukasaun tenke konsidera mos nesesidade no padraun edukasaun iha rejiaun Sudeste Aziátiku.
Adolmando mós sublinha katak, Ministériu Edukasaun (ME) no Ministériu Ensinu Superior, Siénsia no Kultura (MESSK) presiza involve intelektual Timor-oan sira atu dezenvolve kuríkulu ne’ebé adekuadu ho realidade nasional no abertura internasionál.
Nia hateten katak, kuríkulu nasionál tenke loke oportunidade ba estudante sira atu kontinua estudu no buka oportunidade iha CPLP, ASEAN no Europa, sem enfrenta difikuldade tanba diferensa sistema edukasaun.
“Se agora ita la hakarak defende no halo balansu, ita sai problema iha ASEAN, Europa no CPLP,” dehan nia.
Tuir nia, balansu entre kuríkulu CPLP, ASEAN no Europa tenke transforma sai pakote ida iha kuríkulu nasionál Timor-Leste, atu estudante sira bele hetan preparasaun ne’ebé adekuadu no iha oportunidade atu kontinua estudu iha rai-li’ur.
Nia mos apela ba autoridade edukasaun atu loke diskusaun ho akademiku no intelektual Timor-oan sira, hodi dezenvolve kuríkulu ida ne’ebé bele responde ba nesesidade Timor-Leste iha nivel nasional no internasionál.
(joa)
