DILI, STLTIMORLESTE.com – Liu husi diskusaun meza redonda nasional neebe organiza husi Fokupers ho nia parseiru Sekretariu Estadu Igualdade (SEI), Ministeriu Solidariedade Sosial no Inkluzaun (MSSI) no Komisaun F Parlamentu Nasional ho tema “Reflete Progresu, Fortalese Kompromisu Jeneru Liu Husi Alokasaun Orsamentu Sensivel ba Jeneru iha Orsamentu Jeral Estadu 2027”, reprezentante husi komunidade LGBT husu atu tau orsamentu ba sira, tanba durante nee depende deit ba doador sira hodi halo atividade.
Komisaun F Parlamentu Nasional, Maria Gorumali Barreto hatete, iha lei sira nee laiha diskriminasaun ba grupu balun, maibe prioridade ba ema hotu. Tanba sekuandu hakerek lei labele define buat hotu iha neeba. Iha lei tenke hakerek katak laiha diskriminasaun, ema hotu hetan tratamentu neebe hanesan.
Iha interpretasaun nee mak ita boot sira tenke interpreta halo asaun ba iha ida nee, atu klean liu nee so ezekusaun nee ba fali iha governu. Hau labele resposta maibe atu dehan deit, se hau haree ba iha programa, tanba SEI ho MSSI mos iha Komisaun F katak, sira nia programa sira tau prioridade ba iha LGBT inklui ba kapasitasaun no ba apoiu fundus ekonomia nian nee laiha diskriminasaun, nee iha neeba hanesan,” dehan nia hodi responde ba sujestaun no preokupasaun husi partisipante iha ambitu diskusaun meza redonda nasional iha salaun Delta Nova, Segunda (27/07/2026).
Nia afirma, problema mak maluk LGBT sira asesu no appaly ka lae. Maibe atu dehan deit katak, iha lei asegura ema hotu.
Agora problema mak fila fali ba ita boot sira, se ita boot sira asesu ka lae, applay ka lae. Neebe ba maluk sira LGBT hakarak atu dehan, iha lei nee asegura hotu, laiha diskriminasaun iha neeba,” dehan nia.
Diretor Jeral MSSI, Florensio Gonzaga haktuir, governu iha dekretu lei ida ligadu ho instituisaun solidariedade sosial, MSSI loke oportunidade atu instituisaun solidariedade sosial, organizasaun hotu neebe halao nia papel ba reprodusaun ninian posibilidade bele ba rejistu no hetan resenseamentu.
Bainhira iha resenseamentu ita iha point rua importante mak, ida ita bele servisu parserial, ida seluk bele applay proposal ruma no bele konsidera hanesan instituisaun solidariedade sosial neebe presiza atu hetan apoiu,” nia tenik.
Nia hatutan, neebe importante mak atu asesu no applay proposaun ba iha instituisaun nee.
Entretantu liu husi sesaun husu no hatan, reprezentante komunidade LGBT Anitu hatete, koalia konaba igualdade jeneru no inkluzaun, maibe seidauk hetan benefisiu liu-liu maluk LGBT iha Timor Leste sira atu bele ezerse sira nia direitu iha setor hotu, liu-liu iha moris nee. Estratejiku kompletu saida mak husi PN, SEI no MSSI atu asegura ezistensia komunidade LGBT iha TL.
Nia katak, haree orador sira barak liu koalia konaba defisiensia maibe ba LGBT haluha tiha. Nia parte fo sujestaun karik ba futuru bele ka lae tau netik orsamentu ida ba komunidade LGBT.
Durante nee ami depende ba iha doador sira iha rai liur, maibe iha rai laran rasik laiha suporta no la hetan orsamentu atu oituan ka barak maibe ami sei depende deit ba iha doador sira,” dehan nia.
(dom)
