DILI, STLTIMORLESTE.com – Bainhira universidade sira loke kursu doutaramentu la prienxe kriteria neebe estabelese ona, mak kursu nee suspende no labele loke tan.
“Segundu Governu mos suspende atu universidade sira labele loke kursu doutoramentu, suspende signifika saida, hau dala barak koalia ona universidade sira bele servisu hamutuk ho universidade sira iha rai liur atu mai loke doutoramentu, maibe laos sira mak fo sertifikadu, maibe universidade mai husi liur mak fo sertifikadu, atu nunee ita nian doutor sira iha ita nian rai bele sai orientador, atu nunee sira bele aban bainrua hakarak loke karik, loke ho diak no kualidade,” haktuir Ministru Ensinu Superior Siensia no Kultural (MESSK), Jose Honorio da Costa Pereira Jeronimo ba jornalista sira iha salaun INCT, Balide, Kinta nee (10/04/2025).
Nia akresenta, atu hatete mos ensinu superior sira presiza kumpri dekretu lei nu. 2/2018 kona-ba rejime kareira dosentes, foin UNTL mak halo ida nee, tanba iha rejime nee rasik hatete buat haat iha nee ba, dosentes hanesan asistente, dosentes hanesan leitor, dosente hanesan profesor asosiadu, agora atu loke kursu doutoramentu, se kriteria hatete dehan buat haat iha rejime nee iha ka lae.
“Governu suspende iha razaun atu sira bele hadia sira nia uma laran ho diak, depois sira bele kontinua no sira tenke kumpri dekretu lei nu. 2/2018, 24 Janeiru kona-ba rejime kareira, tanba iha segundu alterasaun ba ida nee, ita tenke kumpri ida nee ba, Ministeriu disponível atu ajuda sira, durante nee UNTL mesak deit mak kumpri ida nee, maibe doutoramentu la prienxe kriteriu labele, governu suspende. Universidade balun loke hela, maibe ami hakerek Karta nee taka, sira kontinua loke, entaun Governu hasai rezolusaun haruka taka, tanba seidauk iha tempu loke doutoramentu, hadia lai lisensiatura no mestradu neebe iha,” nia esplika
Iha fatin hanesan, Reitor IOB, Pedro Ximenes seidauk bele fo komentariu kona-ba asuntu ida nee, tanba seidauk lee notisia kona-ba rezolusaun neebe mak aprova iha Konselhu Ministru, bainhira akompanha didiak mak bele fo komentariu ba asuntu ida nee.
(jac)
