DILI, STLTIMORLESTE.com – Bainhira profesores sira kada loron la submete sira nian planu de aula, mak sei afeita ba iha sira nian valor dezempenhu anual neebe halao husi eskola.
Diretor Eskola Hotelaria no Turizmu Becora, Charles F. Guterres hatoo kestaun nee ba STL iha nia knaar fatin, Sesta nee (15/05/2026).
“Ba ita nian profesores sira neebe mak la submete sira nian planu de aula sei afeita ba sira nia valor desempenhu anual, nee duni ita nian profesores sira kada loron tenke halo planu de aula, tanba nee prosesu ensinu aprendizajen iha eskola lao diak,” nia afirma.
Charles dehan, profesores sira tenke submete sira nian planu de aula neebe mak sira prepara ona, tanba durante nee profesores sempre halo sira nian planu de aula, nuudar edukador presiza halo planu.
Iha fatin seluk, Diretor Eskola Sekundariu Jeral nu. 4 Setembru Balide, Sergio A. da Cruz dehan, Eskola Sekundáriu Jeral nu. 4 Setembru Balide kada loron sempre halo kontrola ba profesores sira, karik la halo planu de aula mak parte eskola halo relatóriu ba Ministériu Eduksaun (ME).
“Bainhira ita nian profesores sira dader tama tarde eskola, nee lista prezensa mak kontrola sira. Sira la halo planu de aula, nee husi parte eskola hatoo Informações ba Inspeção no eduksaun munisípiu, los duni sira halo, tanba nee eskola sempre halo kontrola ba ita nian profesotes sira,” nia haktuir.
Sergio dehan, kada loron profesores sira tenke halo planu de aula, hafoin sira bele halo prosesu aprendizajen ba estudantes sira, agora bainhira sira la kumpri mak eskola sei halo relatóriu, hodi bele hatoo ba parte eduksaun munisípiu no nasional.
(jac)
