DILI, STLTIMORLESTE.com – Labarik feto ida neebe lori kaxote plastik kontinua faan krupuk iha tasi ibun hodi sustenta nesesidade moris loron-loron nian iha sidade Dili. Atividade nee nia halao hodi aproveita prezensa vizitante sira neebe mai refreza aan iha fatin turizmu neebe nakonu tebes.
Tuir observasaun hatudu labarik nee iha kbiit hodi tula kaxote plastiku nakonu ho krupuk uza tali kakehe iha nia liman. Nia lao lemo lemo iha tasi hodi oferese nia sasan ba ema hotu neebe tur ka pasia iha fatin neeba.
Vizitante barak neebe mai iha tasi ibun admira ho ninia badinas hodi buka osan iha idade neebe foinsae.Sira neebe sosa krupuk hateten apoiu nee fo mos korajen ba labarik sira neebe esforsu an iha tasi ibun hodi tulun fali sira nia familia.
Atividade faan krupuk nuudar produtu lokal sai nuudar dalan ida neebe popular tebes ba labarik sira iha area tasi ibun Dili. Krupuk sira nee faan ho folin neebe kiik, nunee fasil ba vizitante sira hodi sosa nuudar hahan kman ba deskansu.
Iha loron Domingu ka tempu deskansu nian, tasi ibun sai nakonu liutan ho ema neebe mai ho familia.Situasaun nee nuudar oportunidade diak ba labarik sira hodi hetan rendimentu barak liu duke loron baibain seluk.
Maski situasaun nakonu nakonu ho barulhu husi vizitante no tasi been, labarik sira nee kontinua konsentra hodi buka sosa nain. Sira la tauk ba manas ka anin tasi neebe huu metin durante loron tomak.
Fenomena labarik faan krupuk iha fatin turizmu publiku nee kontinua sai nuudar kestaun neebe interese tebes iha sosiadade. Parte balu haree ida nee nuudar esforsu diak, maibe parte seluk mos preokupa ho sira nia direitu ba estudu no moris labarik nian.
Relasiona ho kestaun nee Vizitante Ida ho naran Mario Alves, neebe sosa mos krupuk iha tasi ibun, haktuir katak presiza atensaun husi parte hotu hotu hodi apoiu labarik sira nee nia futuru.
“Labarik sira iha tasi ibun presiza hetan protesaun no labele lakon sira nia direitu eskola, maski tenke ajuda fali ekonomia família nian iha tempu deskansu,”dehan Mário ba STL, Sesta nee (03/072026).
Nia dehan, kondisaun kbiit laek no ekonomia família nian sai nuudar razaun boot neebe dudu labarik sira hodi tenke tuur ka lao faan sasan iha area publika, maski fo ameasa ba sira nia idade no dezenvolvimentu futuru.
Entretantu Observador Ekonomia, Joao da Silva Soares foti kestaun nee hodi haktuir katak fenomena labarik faan sasan iha dalan ninin no tasi ibun hstudu katak kbiit laek ekonomia familiar nia sei sai dezafiu boot. Nia dehan, Governu tenke kria mekanizmu neebe estruturadu hodi apoiu rendimentu familia kbiit laek sira, nunee labarik sira bele foka deit ba sira nia estudu hodi labele lakon oportunidade dezenvolve an iha futuru.
(car)
