DILI, STLTIMORLESTE.com – Prezidente Associação Empresarial das Mulheres de Timor-Leste (AEMTL), Herqui Luina Fernandes Alves apela ba sidadaun sira labele hein deit saidá mak Estadu fó, maibé ida-idak tenke hatudu responsabilidade no kontribui ba dezenvolvimentu nasionál.
Herqui hato’o deklarasaun ne’e ba jornalista sira iha Salaun CCD, Sábadu (19/09/2026), nu’udar resposta ba apelu Primeiru-Ministru Kay Rala Xanana Gusmão ba juventude no sidadaun hotu atu buka oportunidade no kontribui ba dezenvolvimentu nasaun.
“Populasaun Timor kuaze 50% kompostu husi feto. Hanesan Sua Excelénsia Primeiru-Ministru temi ona, ita labele husik hotu-hotu pasivu, labele tuur husu saidá mak Nasaun fó ba ita, maibé ita hotu iha responsabilidade atu kontribui ba dezenvolvimentu nasaun,” dehan Herqui.
Nia hatete, reuniaun ne’ebé AEMTL organiza sai nu’udar ezersísiu atu identifika no haree potensialidade iha kada munisípiu, inklui oinsá feto sira bele aproveita potensialidade ne’e ba atividade negósiu, hadia moris família no, iha tempu hanesan, kontribui ba dezenvolvimentu nasionál.
Herqui subliña katak, papel feto importante tebes iha ekonomia, tanba feto barak sai inan no kaben, no rendimentu ne’ebé sira hetan hosi atividade ekonomia bele kontribui diretamente ba sira-nia moris no família.
Alende, Primeiru-Ministru Kay Rala Xanana Gusmão mós apela ba juventude Timor-Leste tomak atu la’ós husu deit saidá mak Estadu bele fó, maibé tenke husu ba an rasik saidá mak bele fó ba Estadu.
“Labele husu ba Estadu saidá mak Estadu fó ba imi. Husu ba imi-nia an rasik saidá mak imi bele fó ba Estadu,” dehan Xanana.
Primeiru-Ministru hatete katak, jovem sira tenke buka oportunidade atu kria atividade produtiva no partisipa iha dezenvolvimentu nasionál, duke hein deit oportunidade servisu iha instituisaun Estadu.
Alende ne’e, Xanana mós subliña papel importante feto sira iha dezenvolvimentu ekonomia. Nia husu feto emprezária no empreendedora sira atu identifika área, setor no atividade ekonomia ne’ebé iha potensial atu dezenvolve.
Nia enkoraja feto sira atu servisu hamutuk, inklui liuhosi koperativa, no aproveita potensialidade iha kada komunidade atu dezenvolve negósiu no produsaun lokal.
“Feto sira prepara an iha atividade saidá mak bele prepara an iha ekonomia Timor nian ne’ebé dudu ba progresu,” dehan Xanana.
Xefe Governu mós hatete katak, kontribuisaun ba nasaun la’ós responsabilidade Estadu deit, maibé ema hotu tenke kontribui tuir sira-nia kapasidade no oportunidade.
Nia mós rekoñese katak iha tempu agora, estudante barak remata eskola no gradua, maibé seidauk hetan kampu servisu. Kondisaun ne’e sai dezafiu ida ba jovem sira no nasaun.
(eme)
