DILI, STLTIMORLESTE.com – Laen inisial DM taa mate feen kaben inisial AM ho idade 24, iha Aldeia Hatubatu, Suku Hatolia Vila, Munisipiu Ermera, vitima husik hela oan nurak idade foin halo fulan ida (1).
Xefe Suku Hatolia Vila, Manuel Soares hatuir, insidente refere akontese iha loron 05 Junhu 2025, pur volta tuku 12:00, neebe akontese iha Hatubatu, laen kaben inisial D nuudar moras mental taa mate feen kaben inisial AM ho idade 24 iha uma neebe kauza ba akontesimentu sei iha prosesu investigasaun.
“Nee entre feen ho laen, nia laen nee mak oho tiha nia feen, ita konsidera hanesan omisidiu agrvadu (pembunuhan berencana), tanba falun metin tiha labarik nia isin sira nee nakles hotu, taa ho katana,” haktuir Manuel ba STL liu husi telefone, Kinta (05/06/2025).
Nia sublina, mate isin daudaun Polisia Eskuadra Hatolia asegura hela no hein parte Forensik mai submete ba autopsia, enkuantu suspeitu halai lakon.
Nia fundamenta, suspeitu taa feen kaben nuudar moras metal no tuir informasaun identidade la klaru, maibe suspeitu husi Suku Lauana forma familia ho vitima iha Suku Hatolia Vila.
“Sira nain rua foin forma familia, agora iha oan ida foin fulan ida,” hateten Manuel.
Xefe Suku nee espresa sentimentu triste, tanba vitima idade sei joven, maibe mate laos kestaun saude, maibe mate tanba insidente liu husi taa.
Nunee husu parte seguransa buka tuir suspeitu hodi submete ba prosesu justisa tuir lei neebe vigora iha Timor Leste.
(tom)
