BAUKAU, STLTIMORLESTE.com – Sidadaun joven mane ida idade 22 hetan tata husi Lafaek, rezulta mate iha mota Aldeia Lupuloho, Suku Muapitine, Postu Administrativu Lospalos, Munisipiu Lautem.
Komadante Operasaun Autoridade Protesaun Sivil, Munisipiu Lautem, José Agostinho da Costa Pacheco aprezenta, inisidente nee akontese iha loron 25 Abril 2026, iha neebe sidadaun Junito Amaral, idade 22, hein karau no parte tuku 17:00 loraik sidadaun refere lakon vida, tanba tata husi Lafaek.
“Informasaun neebe komunidade iha neeba hateten katak Avo foti nia iha tuku 05:00 loraik, no Avo tata iha nia ulun nee ita la konhese, liman sira nee tohar hotu, vitima mate kedas iha fatin,” José Agostinho da Costa Pacheco hateten ba STL liu husi telefone, Domingu (25/04/2026).
Nia sublina, hafoin vitima refere hetan insidente nee familia informa kedas ba Autoridade Protesaun Sivil Munisipiu Lautem iha parte kalan, maibe ekipa labele asegura, tanba iha loron refere udan neebe la fo tempu, maibe ekipa halao deit vizilanjia iha area refere.
Maibe liu husi vizilanjia durante kalan tomak, iha loron 26 Abril parte dader ekipa Autoridade Protesaun Sivil Munisipiu Lautem konsege lori sai vitima nia mate isin hodi entrega ba familia no Lafaek refere seidauk asegura.
“Avo iha neeba barak demais, ita seidauk hatene ida neebe mak tata, avo lao ba mai hela iha (mota) laran,” Katak José Agostinho.
Autoridade Protesaun Sivil Munisipiu Lautem nee mos preokupa mota refere neebe daudaun sai fatin ba Lafaek nia moris fatin, maibe Autoridade Munisipal seidauk asegura fatin refere liu husi monta refere haleu mota refere.
Tanba nee Autoridade Protesaun Sivil husu komunidade sira bainhira halao movimentu lao ain iha mota refere atu kuida aan, nunee la afeta ba kondisaun neebe la espera.
Entretantu ba inisidente nee, Autoridade Protesaun Sivil kumpri nia misaun fo ona apoiu emerjensia.
(tom)
