DILI, STLTIMORLESTE.com – Realidade iha Timor Leste seidauk iha investimentu, nee susar atu absolve graduadu neebe kada tinan remata estudu iha universidade.
Haktuir Prezidente Institutu Politeknik Betano (IPB), Acacio Cardoso Amaral ba jornalista STL iha knaar faton, Segunda nee (14/04/2025).
“Ita boot sira hatene katak, ita iha Timor nee ita nian populasaun nee um pontu tres, maibe ita iha universidade hamutuk 19, universidade privadu iha 17, publiku iha 2 UNTL no IPB, agora ita nian industria mos seidauk dezenvolve ho diak, hanesan ita boot sira mos hatene, tanba atu absolve hotu graduadus kada tinan nee araska oituan, tanba maioria agora setor publiku, governu halo rekrutamentu liu husi ministeriu oin-oin, maibe seidauk absolve hotu, setor privadu seidauk dezenvolve ho diak,” dehan nia.
Prezidente IPB, Acacio dehan, bainhira iha industria, hanoin ba oin nee dala ruma trabalhador mak falta, maibe situasaun ida agora daudaun nee industria seidauk mosu barak iha rai laran, presiza iha investimentu neebe barak liu tan, industria barak, atu nunee bele absolve trabalhador barak liu tan iha rai laran.
Iha fatin seluk, Diretor Ezekutivu TLCE, Jose Monteiro dehan, loos duni too agora graduadus barak mak seidauk hetan servisu no balun ba servisu iha rai liur tanba iha rai laran nee menus kampu servisu, tanba ho kampu servisu neebe mak menus, halo graduadus barak sai ba servisu iha rai liur.
“Loos duni too agora ita nian graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur,” nia afirma.
Nunee mos Reitor ISC, Sebastiao Perreia dehan, universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun.
(jac)
