DILI, STLTIMORLESTE.com – Prokurador Jeral Republika (PJR) halao serimonia lansamentu revista Ministeriu Publiku ba edisaun primeiru.
“Ho laran haksolok hau koalia iha serimonia lansamentu Revista Ministeriu Publiku nian, publikasaun neebe lansa fila fali iha edisaun dahuluk ida nee, ho objetivu atu reforsa transparensia, prosimidade no sidadania liu husi divulgasaun atividade sira Prokuradoria Jeral Republika no Prokuradoria Republika primeira instansia sira nian,” dehan Prokurador Jeral Republika, Nelson de Carvalho iha nia intervensaun iha Kolmera, Sesta (12/06/2026).
Tuir PJR, revista trimestral ida nee atu sai nuudar espasu ida ba informasaun no reflesaun kona-ba papel Ministeriu Publiku nian iha administrasaun justisa.
Nia sublina, iha neeba sei koalia konaba inisiativa sira Prokurador Jeral Republika nian, Adjuntu sira Prokurador Jeral Republika nian no servisu sentral tolu PJR nian hanesan Kontensiozu Estadu no interese Koletivu no Difuzu sira, Gabinete Kooperasaun Judisiaria, Direitu Komparadu no Relasaun Internasional sira, no Gabinete Kombate hasoru Korupsaun no Kriminalidade Organizadu no kontribuisaun esensial servisu sira Apoiu Tekniku no Administrativu nian.
PJR relata, atu fo hatene konaba atividade Prokuradoria Republika primeira instansia sira nian, neebe garante prezensa Ministeriu Publiku nian loron-loron hamutuk ho sidadaun no iha munisipiu sira, hodi garante katak justisa halao iha territoriu nasional tomak.
Mia esplika, revista ida nee laos fo sai deit faktu sira. Nia kumpre misaun pedagojika no sivika ida, atu esplika atribuisaun no kompetensia husi orgaun no servisu sira Ministeriu Publiku nian neebe instala ona, hodi fasilita asesu ba lei no justisa no reforsa konxiensia katak nee mak direitu fundamental sidadaun sira nian. No halo ida nee hodi konsolida konfiansa publiku nian iha instituisaun no hodi afirma katak, Ministeriu Publiku nudar guardiaun ba legalidade demokratika, no defende valor fundamental sira komunidade nian.
PJR akresenta, hatoo agradesimentu espesial ba hotu hotu neebe prezente, tanba ho prezensa dignifika serimonia ida nee no fo signifikadu institusional boot tebes. Tanba nee agradese ba prezensa Prezidente Tribunal Rekursu, no Diretor Polisia Kriminal nian, neebe sira nia dialogu no kolaborasaun permanente ho Ministeriu Publiku nudar fundamental tebes, hodi hametin justisa no Estadu Direitu.
Reforsa tan, bainhira Supremu Tribunal Justisa no Tribunal Rekursu ofisialmente estabelese ona sei estabelese mos Prokuradoria Republika Rekursu nian. Medida sira kona ba ida nee, Prokuradoria Jeral Republika foti daudaun hela, nunee hein katak, iha edisaun sira revista ida nee nian tuir mai, bele fo sai mos atividade sira Prokuradoria Republika Rekursu nian, hodi hariku liutan konteudu publikasaun ida nee nian.
Nunee, lansamentu ida nee nuudar mos portunidade atu agradese ba ema hotu neebe kontribui ba edisaun revista ida nee, ekipa teknika PJR nian. Sira nia kompromisu no dedikasaun sai hanesan sasin katak, Ministeriu Publiku nuudar instituisaun ida neebe moris, dinamiku no komprometidu ho servisu publiku.
Konsidera, revista Ministeriu Publiku nian laos deit nudar instrumentu komunikasaun institusional ida. Maibe nudar Veikulu sidadania nian, hodi hakbesik justisa ba sidadaun sira no projeta, ho klareza no rigor, knaar neebe Ministeriu Publiku halao iha konstrusaun Estadu Direitu.
PJR realsa, hein katak publikasaun ida nee atije duni ninia objetivu neebe hakarak, promove konesimentu, transparensia no partisipasaun sivika, hodi hametin konfiansa sidadaun sira nian iha Ministeriu Publiku, iha justisa no iha instituisaun sira seluk neebe intervein iha prosesu administrasaun justisa.
Iha fatin hanesan, Adjunto PJR, Pascasio de Roza Alves dehan, agradese ba PJR neebe iha komitmentu no inisiativa hakarak hamoris fila fali revista MP nian, agradese ba Sekretariu Jeral PJR ho nia kolaborador sira hotu, neebe funsiona gavinete empresa PJR nian, hodi ikus mai halo lansamentu ba revista neebe iha.
“Iha revista nee primera edisaun hamutuk pajina 27, ho nia kapitulu haat, kapitulu primeiru hakerek konaba gavinete PJR nian, kapitulu segundu hakerek konaba Prokuradoria Primera Instansia, kapitulu tolu aborda konaba atividade iha gavinete PJR nian, no gavinete sentral, kapitulu haat koalia konaba atividade neebe halao husi Prokurador Primera Instansia sira,” dehan nia.
Nia hatutan, maske revista ida nee seidauk tuir ema hotu nia espetativa sei iha dezafiu balu, maibe servisu media PJR nian esforsu ona hodi produs revista ida nee, ho edisaun tuir mai sai halo diak liu tan.
Sublina, hatoo ba iha gavinete empresa PJR atu halo planu servisu knar hanesan Media badinas rekola informasaun husi fontes lejitimu, hodi nunee bele ajuda sira nia servisu liu husi hakerek notisia no informasaun sira neebe diak ho kualidade.
Esplika tan, mezmu iha dezafiu esforsu nafatin atu publika revista tuir mai ho diak liu. Husu atu kolabora ho gavinete PJR, liu liu gavinete emprensa atu edisaun sira tuir mai bele diak liu tan. No husu mos ba iha Majistradu sira neebe halao knar iha MP, atu kontribui hodi halo revista ida nee sai diak no kualidade.
Aktual Prokurador salienta, husu atu Majistradu sira fo informasaun relativa ho atividade Majistradu sira nian, iha peskija sientifika, opiniau juridiku kopera ho gavinete emprensa PJR atu halo publikasaun iha revista.
Aleinde nee Adjuntu PDHJ, Rigoberto Monteiro afirma, revista nee importante tebes, atu fo sai atividade neebe MP halao.
“Lansamentu nee parte husi Governasaun diak bolu dehan Instituisaun iha responsabilidade atu halo akontabilidade ba ita nia povu, signifika ita relata saida maka ita halo ba ita nia povu atu hatene saida maka ita halo hanesan parte ida responsabilidade,” dehan nia.
Nia hatutan, revista nee importante atu fo espasu ba iha sosiedade asesu ba iha justisa.
(ter)
