DILI, STLTIMORLESTE.com – Familia Boot Leader Group neebe lidera husi Prezidente Diretor, Foo Hau Kiun, realiza sorteiu ba komprador sira neebe durante tinan ida nee nia laran sosa sasan iha loja sira Leader Group nian, hanesan Leader hypermart, Lita Store, Leader Mart, Li Ang Timor, Toyota Auto Timor Leste, Cement Timor no seluk tan.
Serimonia sorteiu neebe halao iha Salaun Auto Timor Leste, Komoro, Dili, Domingu (8/12/2024), espesialmente loke husi Diretor Jeral Ministeriu Komersiu no Industri (MKI), Nelito Lima de Araujo.
Rezultadu husi sorteiu nee manan nain ba premiu US$ 30.000 ho nomeru sorteu 0002126 mak, Jose Filipe Dias Quintas, manan nain ba premiu US$ 20.000 ho nomeru sorteiu 0000346 mak Antonia Pereira, manan nain ba premiu US$ 10.000 ho nomeru sorteiu 0001414 mak Maria Joana Menezes no manan nain ba premiu US$ 1000 ho nomeru sorteiu 0001904 mak Leila Sarmento.
Nunee mos manan nain ba premiu US$ 500 ema nain 10 no ikus liu ema nain 10 mak sai manan nain ba premiu US$ 200. Ho nunee, iha tinan 2024, husi komprador rihun ba rihun mak sosa sasan iha loja sira Leader Group nian, ema nain 24 mak hetan sorti no mehi diak.
Prezidente Diretor Leader Group, Foo Hau Kiun liu husi Porta Voz, Ligia Tilman ba jornalista sira hatete katak, tinan nee Leader Group realiza sorteu dala ikus no tinan oin sorteiu hanesan nee la halo ona.
“Tinan ida nee tinan ikus ami halo sorteu, ami fo parabens ba manan nain sira no agradese nafatin ba ami nia kliente sira neebe fiar nafatin ba ami hodi kompras sasan iha loja sira Leader Group nian. Ami prontu nafatin atu atende ho diak ami nia kliente sira,” dehan Ligia Tilman.
Nia mos dehan katak, Leader Group neebe lidera husi Timoroan rasik fo servisu ba Timoroan barak neebe prontu atu atende kliente sira.
“Dala ida tan hau hakarak hatete katak, tinan ida nee tinan ikus ami realiza sorteiu no tinan oin ami oferese nafatin buat neebe mak diak liu. Tinan oin ami sei halo atendimentu ba kliente sira neebe mak hetan pontus kompra nian bele mai troka ho voucher kompra iha Leader hypermart, Leader Mart no Lita Store,” dehan Ligia Tilman.
Nunee mos Diretor Jeral Ministeriu Komersiu no Industri, Nelito Lima de Araujo hatete, atividade sorteiu neebe Leader Group realiza nee diak tebes-tebes no hatoo parabens ba manan nain sira.
Iha sorin seluk, manan nain ba premiu US$ 500, Edgar Jose Soares Morato hatete, nia sente kontente tanba husi kliente rihun ba rihun neebe mak partisipa iha sorteiu nee, ema nain 24 deit mak hetan sorti iha tinan ida nee mak hanesan premiu ba US$ 200 no US$ 500, manan nain hamutuk 20 no ema nain 4 mak sai manan nain ba premiu US$ 1000, US$ 10.000, US$ 20.000 no US$ 30.000.
“Hau agradese tebes ba familia boot Leader Group neebe bele realiza sorteiu nee no premiu neebe hau hetan bele uza ba festa Natal no tinan foun,” dehan Edgar ho espresaun kontente
(mik)
