DILI, STLTIMORLESTE.com – Jeneral Reformado Lere Anan Timur hatete, nia iha mehi atu kandidata aan ba Prezidente Republika iha 2027, maibe husi nia Partidu FRETILIN, maibe karik partidu la fo konfiansa sei avansa ho independente.
Tenente Jeneral Reformado Lere Anan Timur hatoo kestaun nee ba jornalista sira, bainhira remata partisipa selebrasaun 20 Agostu, ezistensia FALINTIL ba dala 51 iha Foho Matebian, Munisipiu Baucau Kinta (20/08/2026).
Nia hatete, uluk nia iha kompromisu rua mak liberta funu no liberta povu, no funu hotu ona, maibe povu seidauk moris diak, tanba nee nia hakarak kandidata aan hodi hasai povu husi kiak no mukit.
Jeneral Reformado Lere hatete, nia partidu mak FRETILIN, tanba nee nia hakarak kandidata aan husi nia partidu maibe karik lideransa husi Partidu la tau konfiansa ba Jeneral Reformado Lere mak nia sei avansa nafatin ho independente.
“Baibain hau dehan bainhira hau nia kompromisu rua deit uluk iha funu hau kompromete atu liberta hau nia patria mate ka moris ukun rasik aan, hau aseita hau nia vida para Timor Leste hetan ukun aan, mais destinu naruk hau la mate, agora falta kompromisu ida neebe mak hau seidauk kumpre hanesan mos maluk sira seluk seidauk kumpre mak liberta povu, liberta povu husi saida husi kiak no mukit, ita hatene katak ita nia nasaun neebe deit apos funu sempre iha kiak no mukit, barak agora batalha, ida mak nee, enkuantu hau sei forte saida mak hau bele, hau serbi liu husi Prezidente Republika ka la Prezidente hau serbi, maibe se bele 2027 hau bele kandidata hau nia aan,” dehan Eis Komandante F-FDTL Lere.
Karik kandidata aan ho indepedente ka ou husi Partidu FRETILIN, hatan ba kestaun nee Jeneral Reformado Lere hatete, nia partidu mak FRETILIN, se nia partidu la kandidata nia, sei lao ho indepedente.
“Hau partidu FRETILIN ninia, hau leal ba hau nia partidu, leal ba hau nia estrutura, mais agora sira hau nia partidu sira leal ba hau ka lae? hau nee leal too mate nee pratika hatudu ona hau kompremete fo hau nia vida ba FRETILIN, hau FRETILIN nafatin, ida nee mak hau agora nafatin FRETILIN nuudar membru Comite Central segundu jerasaun hau laos terseiru jerasaun nein primeiru jerasaun, hau segundu jerasaun, foti hau iha hudi tahan okos bee,” dehan Jeneral Reformado Lere.
Karik Partidu FRETILIN la kandidata Jeneral Reformado Lere no kandidata lider seluk husi Partidu FRETILIN, Jeneral Reformado kontinua kandidata aan ka lae? hatan ba kestaun nee Jeneral Reformado Lere hatete, se Partidu FRETILIN iha kandidatu seluk, nia nafatin avansa tanba partidu mak laiha konfiansa ba nia.
“Se sira kandidatu seluk hau avansa tanba sira mak laiha konfiansa ba hau, hau hakarak hau nia partidu depozita konfiansa ba hau no kandidata hau, se kandidata seluk hau mos avansa para ami hela hotu, ami ba lakon hotu, FRETILIN lakon ona lakon beibeik,” Katak Jeneral Reformado Lere.
Eis Komandante F-FDTL hatete, nia ho Sekretariu Jeral Partidu FRETILIN, Mari Alkatiri iha ligasaun neebe diak, laiha problema ruma dezde uluk too mai agora.
“Hau nia maun nee ohin kalan hau bolu nia iha telefone, nia bolu hau ba kedas dehan mai deit mai deit, hau nia maun nee atu kalan mak ba mos nia simu, naran sa oras, agora hau fila dala ruma aban ami nain rua hasoru malu,” hakotu.
(eme)
