DILI, STLTIMORLESTE.com – Tenente Jeneral Reformado Lere Anan Timur hatete, maske sosiedade hatete lider istoriku Kay Rala Xanana Gusmão no Mari Alkatiri hirus malu, maibe sira nafatin ema Timor oan no sira rua mos uluk halo funu dezenvolve rai nee ba hetan ukun rasik aan.
Asesor Prinsipal Prezidensia Republika, Tenente Jeneral Reformado Lere Anan Timur hatoo kestaun nee ba Jornalista bainhira remata partisipa seminariu Nasional iha salaun UNPAZ, Sesta (29/05/2026).
Jeneral Reformado Lere dehan, maske sosiedade bele dehan katak lider rejistensia nain rua Kay Rala Xanana Gusmão no Mari Alkatiri hirus malu maibe sira rua mos hanesan ema luta nain ba rai ida nee tuir kbiit neebe sira iha hodi lori rai nee ba hetan ukun rasik aan.
“Ita koalia konaba unidade nee hau hanoin unidade ita labele haree husi liur aparensia, sosiedade bele dehan katak maun Mari, Maun Xanana, haree malu ladiak sira bele haree malu diak ka ladiak mos Timor mak ida nee, semak ukun mak ukun, ema la ukun nee bele koalia oinsa mos nia laiha refleksu ida, maibe ema neebe ukun ezemplu nunu Governu konstitusional maun Xanana nia partidu mak ukun hamutuk ho PD sira mak ukun sira mak deside mais hau hanoin katak sira laos ema seluk ema leet sira nee timor oan, sira mos uluk halo funu sira dezenvolve rai ida nee tuir realidade tuir forsa tuir kbiit neebe ita iha,” dehan Tenente Jeneral Reformado Lere.
Lere dehan, ideolojia la hanesan laos foin akontese ba lider nain rua maibe uluk iha ai laran iha tempu luta mos hanesan dala ruma ideolojia lahanesan maibe sira nia objetivu mak ida deit hakarak lori rai nee ba hetan ukun rasik aan.
“Sira nain rua bele problema ezemplu hanesan uluk iha ai laran hanesan iha tinan 1984 krize boot ida, soldadu sira dehan hanesan nee ami hakarak ukun aan agora imi boot sira nia problema nee problema imi nia mais ami nia hakarak aluta kontinua lao ba oin nafatin ida nee mak tenke sai ezemplar ba ita nia lider sira ba ita nia joventude katak ita nia aman sira nia problema nee sira nia problema naran katak ita nia nasaun nee mak labele hakiduk tinke lao ba oin,” dehan Asesor PR.
Iha biban nee Jeneral Lere husu foinsae sira nafatin estuda nunee ho kapasidade hodi lori rai nee ba dezenvolve diak liu tan, tanba Timor Leste hetan ukun rasik aan husi prosesu lubuk ida husi terus no mate foin rai nee hetan indepedensia.
Nunee mos Diretor Ezekutivu AMRT,IP Jorge Alves (We Moris) hatutan tan katak timor leste hetan ukun rasik aan husi dalan ida neebe nakonu ho terus, ho korajen, ho unidade no ho esperansa. Dalan ida neebe lori Timor-Leste husi okupasaun ba liberdade, husi Rezistensia ba Restaurasaun Independensia, no husi luta ba sobrevivensia ba konstrusaun Estadu.
“Tema neebe ohin halibur ita mak Hamutuk Ita Sei Harii Patria ida neebe justu, inkluzivu liu no reziliente liu tan fo hanoin hikas mai ita katak independensia nee hetan husi ema hotu-hotu nia luta, no ita hotu tenke kontinua harii. Patria la harii deit ho lei, edifísiu ka instituisaun. Patria harii ho valores. Harii ho justisa, ho inkluzaun, ho solidariedade, ho respeitu ba memoria, no ho sentidu responsabilidade nasional,” hakotu.
(eme)
