DILI, STLTIMORLESTE.com – Partidu Kongresu Nasional Rekonstrusaun Timorense (CNRT) hamutuk hodi presta omenajen ikus ba isin mate Antigu Prezidente Republika no Prezidente Partidu FRETILIN, Saudozu Francisco Guterres Lu Olo neebe dadaun nee simu hela solidaridade husi parte oioin iha ninia rezudensia Farol, Díli. Iha fatin neeba lideransa CNRT hamutuk hodi rekonhese no valoriza safrefisiu boot neebe saudozu fo ona ba libertasun rai Timor Leste nian.
Hafoin presta omenajen, Visi Prezidente Partidu CNRT, Virgilio Smith hateten katak, desizaun nee nuudar dever obrigasaun husi sidadaun hotu, inklui partidu politiku sira, tanba saudozu nuudar figura Lider Nasional ida neebe fo ona ninia kontribuisaun boot ba nasaun.
“Nee nuudar dever obrigasaun sidadaun hotu hotu nian, inklui partidu politiku sira, tanba saudozu nuudar Lider Nasional ida neebe sakrefika nia moris ba libertasaun rai ida nee.Nunee mos iha estrutura no orgaun sobetanu sira, hanesan Parlamentu Nasional no Prezidente Republika, nia merese respeitu husi Timor oan hotu hotu,” Virgilio Smith afirma ba jornalista sira, hafoin presta omenajen iha rezidensia Farol, Díli, Kinta (25/06/2026).
Visi Prezidente Partidu CNRT nee sublina katak,maski iha diferensia politika, maibe sentimentu hanesan rai ida nee nia oan no rekonhesimentu ba sira neebe sakrefika vida tomak ba rai nee tenke sai buat neebe importante liu.
“Konflitu politiku nee buat pasajeru, too tempu ida nia sei hotu. Maibe sentimentu hanesan rai ida nee Nia oan, sentimentu ba ema sira neebe sakrefisiu sira nia moris tomak ba rai nee too ohin loron ita hetan liberdade, nee buat ida neebe labele haluha,”nia hatutan.
Virgilio Smith mos rekonhese katak, durante periodu funu naruk, Prezidente CNRT, Kay Rala Xanana Gusmão, konhese besik liu istoria no sakrifisiu husi lider nasional rezistensia sira nian, tanba nuudar komandante em-xefe neebe hamutuk durante luta.
Iha fatin hanesan Adjuntu Sekretariu Jeral Partidu CNRT, Jacinto Rigoberto esplika katak prezensa delegasaun CNRT mai husi orientassun diretu husi Prezidente Partidu, Kay Rala Xanana Gusmão. Maski dadaun nee Prezidente Partidu ho Sekretariu Jeral sei halo hela programa Estadu nian iha rai liur, maibe sira kontinua akompanha ho besik situasaun nee no fo orientasaun ba kuadru nasional sira.
“Ami halao komunikasaun direitu ho Sekretariu Jeral no Prezidente Partidu, maun boot Kay Rala Xanana Gusmão, orienta ona katak kuadru nasional no munisipiu sira hotu tenke mai presta omenajen ho korajen ba saudozu Francisco Guterres Lu Olo. Tan nee ohin ami mai presta omenajen ba saudozu, neebe nuudar Prezidente luta nian no aman ba nasaun ida nee,” Jacinto Rigoberto hatete.
(car)
