DILI, STLTIMORLESTE.com – Atu limita ema estranjeiru halo dupla ka kopia tais Timor Leste (TL) nian hodi faan iha merkadoria, governu presiza asegura ho regulamentu hodi fo sansaun bá sira.
Tuir Veterana Fransisca da Costa hatete, nudar sidadaun no Timor oan ladun satisfas ho Xineza sira neebe kopia tais Timor nian sai bá pasta, karteira no seluk tan hodi faan iha loja sira. Ida nee bele halo folin tais orijinal Timor nian neebe halo no faan husi Inan Soru Nain sira iha merkadoria.
Nia katak, tais nudar identidade Timor nian, tanba nee governu tenke fo atensaun bá ema sira neebe halo dupla nee.
“Hau hanoin bainhira ema dupla ita nia tais sira nee, halo ita nia inan sira neebe soru tais no faan tais sira nee triste no laran susar, tanba sira nia produtu ka obra sira la folin iha merkadu. Liu-liu folin tais kopia neebe Xineza sira faan ho folin neebe baratu, entaun halo it nia inan sira neebe soru nee lakon vontade atu kontinua sira nia obra, tanba deit sira nia tais la folin,” dehan nia bá STL iha Bidau, Sesta (15/05/2026).
Nia afirma, husu bá governu neebe kompetensia atu asegura ema sira neebe halo dupla ho regulamentu neebe forte.
Entretantu Sekretariu Estadu ba Arte no Kultura (SEAK), Jorge Soares Cristovão hatete, tempu badak parese fulan ida nee nia laran SEAK sei servisu hamutuk ho Ministériu Comersiu i Industria hamutuk ho parseiru internasional para hamutuk kria regulamentu bá implementasaun lei, neebe lei presiza implementa duni.
“Ita hatene katak TL nia adezaun ho organizasaun internasional sira mos fo impaktu bá ida neeba. Agora mos presiza regula artigu balun hodi kobre ba regras internasional sira nee. Ida neemak hakarak ka lakohi ami tenke aseslera hodi fo espasu bá rede soru nain sira para asegura sira nia obra sira nee,” dehan nia.
Nia afirma, SEAK sei servisu hamutuk ho Komersiu hodi halo kontrola bá Xina sira neebe gosta kopia no dupla ema nia sasan sira neebe sira faan ba.
Regulamentu sira nee sei fo sansaun no fo koima ba sira, atu nunee sira bele kumpri ida nee.
(dom)
