DILI, STLTIMORLESTE.com – Dosentes neebe ho grau lisensiatura iha Instituto Superior Cristal (ISC) sai asisten dosentes, maibe balun hahu kontinua sira nia estudu ba mestradu.
Haktuir Reitor Instituto Superior Cristal (ISC), Sebastiao Pereira ba STL iha nia knar fatin Kuarta nee (22/04/2026).
“Ami nian dosentes iha quinentus resin, nee inklui ho ami nian polo sira nee, nee mak hamutuk quinentus oetenta novi, nee iha balun maestradu, doutoramentu, lisensiatura, liu-liu sira neebe hanorin bacharelatu nee lisensiatura no maestradu, balun hanorin iha maestradu nee doutoramentu hamutuk 28, maestradu nee kuaze trezentus resin, lisensiatura nee iha 58, nee balun kontinua ona sira nian estudu online no balun ba iha offline, husi sira nee mak agora dadaun lao hela,” nia dehan.
Nia dehan, husi dosentes lisensiatura 58 nee, balun sai asiste dosentes, balun sai funsionariu, liu-liu ba iha atendementu pratika laboratorium nian, balun ba iha jestaun administrativa, hodi halo atendementu ba estudantes sira.
Entretantu Reitor Instituto Ciensia Saude (ICS), Leao Borges katak, Dadaun nee dosentes lisensiatura (S1) husi Instituto Ciensia Saude (ICS), nain nen kontinua Sira nian estudu ba maestradu iha nasaun Portugal no Brazil.
“Ami nian dosentes permanenti nee lima nolu resin, ho sira bolu dehan parte tempu nee hamutuk atus ida resin, ami nian dosentes lisensiatura nee sei iha, lisensiatura nee hanorin diploma 3, agora dadaun sira barak mak ba foti ona maestradu, balun tinan nee hotu ona, balun sei kontinua,” nia esplika.
Reitor ICS nee hatutan, bolsu estudu husi FDCH, tinan kotuk 2025 nee iha nain nen mak pasa teste, no dadaun nee sira kontinua estudu ba maestradu iha nasaun Portugal no Brazil, nain rua iha Portugal, nain hat iha Brazil, maestradu nee husi FDCH fo ba sira tinan rua ho balun, nee duni tinan 2028 mak Sira remata estudu.
“Ami nian dosentes lisensiatura nain nen, neebe agora dadaun ba kontinua estudu maestradu ninia nee iha area infarmajen, nutrisaun, ho farmacia, tinan nee ami nian dosentes nain hat mak hatama ona dokumentus iha MESSK, para bele tuir teste, nain hat nee husi lisensiatura ba maestradu, sei tuir teste,liu ou lae,nee ita seidauk hatene,” nia informa.*
(jac)
