DILI, STLTIMORLESTE.com – Eskola Sekundariu Jeral (ESJ) FINANTIL livrus ba estudantes iha materia matematika no fisika seidauk kompletu.
“Hau hanoin livru ba ita nian estudantes sira nee mak seidauk kompletu ida, maibe ami halo pedidu hotu ona ba Ministeriu Edukasaun para bele fo apoiu livru mai ami nian eskola, livru neebe sei falta mak hanesan fisika no matematika, nee ami halo pedidu ona, tanba buku balun haruka ona mai maibe seidauk kompletu ida, nee duni ami hakarak atu halo kompletu deit iha biblioteka ninia,” dehan Diretor Eskola Sekundariu Jeral FINANTIL, Aniceto Berlelo ba STL, Kuarta nee (05/08/2026).
Nia dehan, livru ba estudantes nee mak sei menus, maibe balun Ministeriu Edukasaun fo tan ona, nee duni livru neebe mak estudantes sira atu lee nee iha ona, estudantes sira barak mak seidauk mai eskola, depois de feriadu, horiseik Segunda mak estudante sira foin tama iha eskola no barak mak seidauk tama.
“Atu asegura livru nee mak ami kria biblioteka nee, tanba biblioteka nee ninia funsaun mak atu asegura livru no ema hirak neebe mak toma konta iha biblioteka nee, tanba durante nee ita nian estudante sira asesu biblioteka ho diak,” nia esplika.
Nunee mos Koordenador Gabinete Unidade Kurrikulu Nasional iha Ministeriu Edukasaun, João Mau Pelu hatete, Ministeriu Eduksaun liu husi Unidade Kurrikulu Nasional kontinua Imprimi livru iha sentru impresaun.
“Primeiru, livru ita sei halo impresaun, balun ita distribui tiha ona, tanba livru ba setimu ano nian ita distribui hotu ona, ba terseiru siklu setimu ano, ita distribui hotu ona, nee kuaze kada disiplina ita imprimi 27 mill, nee ita kalkula kuaze besik too ita nian estudantes ida-idak, maibe karik ita nian eskola balun seidauk too ou seidauk kobre ba ita nian estudantes ida-idak, ita husu ba eskola atu halo jestaun,” nia informa.
Nia dehan, konaba livru nee husu ba eskola ida-idak oinsa halo jestaun neebe mak diak, oinsa estudantes sira bele impresta livru sira nee, lori ba grupu ida rua bele uza hamutuk halo diskusaun, tanba oinsa sira bele estuda hamutuk, nee para estudantes bele uza didiak, iha momentu profesor atu hanorin, nee estudantes grupu uza livru nee, depois professor hanorin nee diak tebes.
(jac)
