DILI, STLTIMORLESTE.com – Loja nain sira iha area juridiku Munisipiu Dili aseita ho opsaun rua neebe Komando Polísia Nasionál Timor Leste (PNTL) deside hakarak loja nain sira halo rekrutamentu ba sira nia pesoal seguransa estasionamentu rasik, hodi kontribui ba redus engarrafamentu iha kapital Dili.
“Iha loja nain hamutuk 260 mai husi sidadaun Timoroan no estranjeiru, neebe ita fo opsaun rua, maibe sira hakarak loja nain sira halo rekrutamentu ba sira nia pesoal seguransa estasionamentu rasik hodi kontribui ba redus engarrafamentu iha kapital Dili,” hatete Diretor Diresaun Tranzitu Seguransa Rodaviariu Nasional (DTSRN), Superintendente Asistente Polísia, Luis da Costa ba jornalista sira, iha nia knaar fatin Kuartel Jerál PNTL, Dili, Tersa (15/04/2025).
Nia tenik, pesoal seguransa ba estasionamentu nee loja nain sira mak sei rekruta hodi kontrolu ba kliente sira, bainhira kompra sasan iha loja tenke estasiona transporte tuir regulamentu neebe loja nain sira estabelese, nunee labele hamosu engarrafamentu hodi difikulta fali movimentu transporte sira seluk.
Nia esplika, durante enkontru ho loja nain sira apresia tebes ho Komando PNTL liu husi Diresaun Tranzitu Seguransa Rodaviariu (DTSR) hamutuk Diresaun Transporte Terrestres bele halibur ona loja nain sira hodi rona sira nia ideias molok implementa lei kodigu Estrada numeru 06/2003 kona-ba seguransa rodaviariu nian.
Iha fatin ketak, Komprador Julia Ximenes informa, se loja nain hakarak loja nain mak halo rekrutamentu ba estasionamentu nee diak liu, maibe husu atu labele selu.
“Sira hakarak halo rekrutamentu seguransa ba estasionamentu nee diak, maibe husu ba labele selu fatin para motor ho kareta, tanba sira loke loja mak ita ba sosa sasan iha sira nia fatin no se karik selu entaun tenke hatama ba kofre estadu,” nia afirma.
Entretantu enkontru nee lidera direitamente husi Segundu Komandante Jerál PNTL, Komisariu Polisia Pedro Belo no Diretor Diresaun Tranzitu Seguransa Rodaviariu (DTSR) Superintendente Assistensia Polisia, Luis da Costa hamutuk ho Diretora Diresaun Transporte Terrestres, Maria Antónia Vitor da Costa ho Loja nain husi sidadaun Timoroan no estranjeiru hamutuk 260 halao atividade negosiu iha area Juridiku Munisipiu Dili.
(jen)
