DILI, STLTIMORLESTE.com – Edukasaun pré-eskolár no ensinu baziku iha Munisípiu Bobonaro presiza aumenta tan númeru manorin, tanba iha planu atu loke pré-eskolár foun hamutuk 17.
Diretór Servisu Edukasaun Munisípiu Bobonaro, Miguel Freitas, hatete ba STL liu husi via-telefoni, Kinta (17/09/2026), katak husi pré-eskolár foun 17 ne’e, balun loke ona, enkuantu balun sei loke iha tinan 2027.
Nia dehan, ho aumentu pré-eskolár foun sira ne’e, Ministériu Edukasaun presiza aumenta tan númeru professores ba pré-eskolár no ensinu baziku iha Munisípiu Bobonaro.
“Konaba professor, iha ensinu pré-eskolár no ensinu baziku sei menus, maibé ami sei hein nafatin rekrutamentu professor ne’ebé ME halo. Balun liu ona teste no hein koloka husi nasionál. Atu aumenta professor, liuliu ba pré-eskolár, kuaze maioria sei presiza. Ensinu baziku mós nune’e, professor seidauk kompletu,” nia hateten.
Miguel informa katak, iha Bobonaro atualmente iha pré-eskolár hamutuk 59 no, ba nesesidade ne’e, presiza tan manorin hamutuk 30, tanba pré-eskolár foun sira sei aumenta.
“Total estudantes iha Munisípiu Bobonaro hamutuk 37.949, total eskola hamutuk 204, no total professores hamutuk 1.778. Eskola balun husu apoiu atu aumenta tan professor,” nia afirma.
Nia akresenta katak, eskola balun iha Munisípiu Bobonaro mós presiza hadi’a tanba kalen balun aat ona. Aleinde ne’e, iha nivel ensinu rua ne’ebé sei presiza aumenta manorin, liuliu ba futuru, no pré-eskolár foun ne’ebé sei loke.
Enkuantu, Diretór Servisu Edukasaun Munisípiu Ainaro, Patrício da Costa Magno, hatete katak, bainhira atu loke eskola foun ruma, presiza hetan lisensa husi autoridade kompetente iha Ministériu Edukasaun.
“Hau hanoin, bainhira atu loke eskola foun ruma, presiza hetan lisensa husi autoridade iha Ministériu Edukasaun. Eskola balun iha Ainaro presiza aumenta manorin, tanba seidauk sufisiente,” nia informa.
(jac)
