DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial LMM, tanba lori sasan kompahia nia ba tau iha uma.
Iha sala julgamentu laran, Juiz prosesu lee sai akuzasaun katak, iha loron 28 fulan Setembru tinan 2020, arguidu LMM hetan fiar asumi kargu nuudar Jerente ba Obra Civiles iha Kompania ENGIPRO Timor Leste no fiar nee hetan direita husi lezadu LC nuudar Diretor ba Kompanhia refere.
Iha loron 5 fulan Outubru tinan 2020, arguidu hahu servisu iha kompanhia refere no uza DRON halo levantamentu ba dadus sukat rai iha Munisipiu sira hotu ho nia durasaun fulan rua. Fulan rua nee la konsege termina, no kontinua estende tan fulan rua hamutuk fulan haat, no termina servisu iha loron 05 fulan Fevereru tinan 2021.
Tuir akordu neebe selebra entre Kompanhia reprezenta husi lezadu no arguidu katak, kada fulan Kompanhia sei selu salariu ba lezadu ho montante US$ 3000,00.
Haree katak servisu neebe arguidu halo termina deit iha fulan haat nia laran, ho nunee arguidu hatoo pedidu ba lezadu no lezadu aseita atu arguidu kontinua servisu nafatin ho kompanhia refere.
Lezadu hatan no hateten ba arguidu katak, uma vez servisu la iha ona, Kompanhia so bele selu ba arguidu kada fulan US$ 1.500.
Iha fulan Abril tinan 2021 lezadu halo konfirmasaun servisu ba arguidu, hodi haruka arguidu kontinua haree servisu, tanba arguidu hanesan Project Manajer iha Kompahnia refere.
Iha fulan Junhu tinan 2021 arguidu manda email ba lezadu hodi hateten katak, lezadu enganha ona arguidu tanba lezadu la preokupa ho situasaun trabalhador sira nian.
Ikus mai mosu dezentendimentu balu, tanba nee arguidu hateten ba lezadu katak, komesa husi fulan Junhu arguidu la iha relasaun servisu ho lezadu, no ekipamentu no karreta kompanhia nian neebe durante nee arguidu uza ba servisu hanesan cartografia, drone, karreta ida arguidu la entrega ba lezadu.
Sasan sira neebe temi iha leten, arguidu foti sai no lori ba rai hotu iha arguidu nia uma.
Tanba nee, Ministeriu Publiku akuza arguidu komete krime furtu Agravadu neebe previstu iha artigu 252 husi Kodigu Penal.
Hatan ba akuzasaun neebe iha, arguidu konfesa imparsial katak, faktus neebe konsta iha akuzasaun loos, kona-ba karreta no drone no ekipamentu sira arguidu mak foti hodi rai iha arguidu nia uma.
Razaun arguidu foti sasan sira nee laos uza ba arguidu nian, maibe atu asegura deit bainhira lezadu selu arguidu nia osan hotu, arguidu sei devolve fila fali.
Arguidu deklara, sasan sira nee too agora rai didiak hela. Rona tiha arguidu tama ba iha faze alegasaun, Prokurador husu Tribunal atu absolve arguidu, tanba arguidu iha razaun neebe forte, no sasan neebe arguidu foti laos uza, maibe asegura deit tanba lezadu la fo arguidu nia osan.
Enkunatu husi parte defeza nian mos aseita ho pedidu Ministeriu Publiku nian.
Rona tiha parte rua, Tribunal adia ba loron seluk hodi tama ba iha desizaun.
Audensia julgamentu nee prezidi husi Juiz Koletivu, Arjentino Nunes, Zulmira Auxiladora, Ivan Suritai, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Juvinal Dias.
(ter)
