DILI, STLTIMORLESTE.com – Ministeriu Publiku (MP) iha alegasaun ba krime Violensia Domestika ho Arma Branka, solisita ba iha Tribunal atu kondena pena suspensaun ba arguidu inisial JMC hanesan laen, neebe komete krime hasoru lezada inisial VC hanesan feen.
Iha alegasaun nee Prokurador Napoliao da Silva deklara katak, arguidu konfesa ba faktus ho kondisaun lanu halo duni agresaun hasoru lezada. Prokurador deklara, maske sira diak malu ona maibe presija halo prevensaun atu iha futuru labele akontese tan.
Prokurador deklara, atu halo prevensaun iha futuru, Prokurador husu Tribunal atu aplika pena prizaun tinan 3, suspende tinan 3 ba arguidu.
Enkuantu defeza arguidu nian deklara katak, arguidu foin primera vez mai iha Tribunal, arepende tebes ba nia hahalok, tanba nee husu Tribunal atu aplika pena neebe justu ba iha arguidu.
Rona tiha alegasaun, Tribunal adia ba loron seluk hodi rona desizaun.
Iha indisus sufisiente katak, iha loron 17 fulan Julhu tinan 2024, iha Benbonuk Dili arguidu foti tudik dapur nian ida, hodi tuda kona iha ofendida nia liman parte loos, tuir mai arguidu foti kadeira masa ida tuda kona iha ofendida nia liman no kotuk laran.
Konsekuensia husi arguidu nia hahalok, halo ofendida sente moras iha liman no kotuk laran.
Ofendida halo tratamentu iha Sentru Saude Comoro, liu tiha semana ida foin diak.
Kauza husi problema nee, tanba arguidu hemu tua lanu.
Tanba nee, Ministeriu Publiku (MP) akuza arguidu komete krime Violensia Domestika, ho forma Ofensa Integridade Fisika Simples previstu iha artigu 145 husi Kodigu Penal, no Arma Branka.
Audensia julgamentu nee prezide husi Juiz Ana Paula, Jose Maria, Ersilia de Jesus, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku, Jermano.
(ter)
