DILI, STLTIMORLESTE.com – Durante loron sanulu (10), husi dia 7 too 17 Junhu nee, iha area juridiku Munisipiu Viqueque kontinua hetan rai nakdoko kada loron. Tuir dadus neebe iha, fenomena nee akontese kuaze kada loron no iha tempu balu bele akontese too dala sia (9).
Komandante Operasaun Autoridade Protesaun Sivil (APC) Munisipiu Viqueque, Cerilo Soares Gomes aprezenta, rai nakdoko nee afeta liu Postu Administrativu Ossu, liu liu iha area Builo, Ossorua no Uaibobo. Situasaun hanesan mos senti iha Postu Administrativu Uatulari no Viqueque Vila, maibe makaas liu iha area Ossu.
“Rai nakdoko nee loron ida bele too dala sia. Agora mos kontinua nafatin hanesan nee. Rai nakdoko makaas oituan tanba kadeira sira mos bele monu,” hateten Cerilo ba STL liu husi telefone, Kuarta (17/06/2026).
Nia esplika katak, konsekuensia husi rai nakdoko nee, foho iha area Builo komesa nakfera no tarutu ameasa seguransa komunidade sira neebe hela besik. Tanba nee, APC Munisipiu Viqueque hamutuk ho Autoridade Munisipal halo ona levantamentu no prepara medida evakuasaun ba familia afetadu sira.
Tuir nia, total uma kain 17 mak identifika iha area risku. Husi numeru nee, uma kain 6 iha Builo no uma kain 11 iha Aldeia Uaibobo, Ossorua. Agora daudaun, familia sira nee hela provizoriamente iha uma familia sira nian.
“Komforme foho Builo nee mak nakfera no tarutu hela deit hodi fo ameasa ba ida nee,” dehan Cerilo.
Nia deklara, kona-ba kauza loloos husi rai nakdoko nee, Cerilo katak parte APC Nasional mak iha kompeténsia atu halo analize tekniku no fo esplikasaun ofisial. Enkuantu APC Munisipal nia papel prinsipal mak fo asistensia ba komunidade afetada no halo preparasaun resposta ba dezastre naturais.
Entretantu, APC Munisipiu Viqueque kontinua husu komunidade sira atu alerta no aumenta vijilansia, liu liu ba familia sira neebe hela iha fatin besik foho no area neebe konsidera vulneravel, atu bele antisipa risku no evita perdas vidas iha eventualidade situasaun nee agrava.
(tom)
