DILI, STLTIMORLESTE.com – Suar metan taka Dili no loron sai nakukun ba vendedór barak, hafoin ahi han hotu Merkadu Taibesse Sesta kalan no eis Merkadu Komoro Sábadu dader.
Inséndiu dahuluk mosu iha Merkadu Taibesse, Dili, iha Sesta-feira kalan, haleu tuku sanulu liu minutu lima (10:05 PM), loron 25 Setembru 2026.
Bainhira akontesimentu ne’e mosu, balu husi vendedór sira sei hader fa’an hela sasán kalan nian, balu movimenta ba-mai hodi rai hela sasán, balu seluk toba de’it ona iha kios laran tanba kole.
Iha momentu ne’ebá, ahi hahú husi kios ida iha parte laran no habelar lalais, tanba anin no kios sira ne’ebé harii besik malu ho material ne’ebé fasil sunu.
Iha loron hanesan, Sábadu, 26 Setembru 2026, inséndiu mosu tan iha área eis Merkadu Komoro, Dili, mais ou menus akontesimentu ne’e akontese iha tuku 8:30 dader. Ahi boot hamate loron-matan dader nian, no halo komunidade iha Komoro halai sai ho pániku. Kios kuaze atus ida resin ahi han hotu.
Laiha ema mak lakon vida, maibé lakon ekonomia boot tebes. Tuir dadus provizóriu husi vendedór sira, prejuizu hamutuk liu US$150,000. Sasán, osan kapital, no dokumentu fa’an nian hotu sai ahu-kadesan.
Iha leet ahi suar no ahu kadesan sira nian, tristeza no terus inan sira nian mak todan liu hotu.
“Ha’u la tanis tanba kios, ha’u tanis tanba ha’u-nia oan sira. Osan ne’e ha’u rai atu selu eskola, atu sosa foos, atu selu uma. Agora laiha hotu ona, ahi han hotu ona,” dehan Inan Esperança da Costa 45 anos, vendedóra tais, iha Taibesi tinan 10, ho matan-been ne’ebé sulin ba STL, Segunda (28/09/20276).
Ho matan-been ne’ebé sei sulin, inan ne’e dehan tan, merkadu ne’e mak fó han ba oan na’in tolu no haruka sira ba eskola.
Tinan 10 hamriik iha ne’e loron-loron. Agora atu ba fa’an iha ne’ebé,” Hau husu ba governu atu labele haluha povu ki’ik,”hatete inan nee ho triste.
Iha parte ketak, Observadór Ekonomia, Jorge de Oliveira, fó ninia análize katak inséndiu rua ne’e la’os asidente baibain de’it, maibé sinál ba frakeza sistémiku.
“Ekonomia Dili nian depende makas ba merkadu rua nee. Bainhira merkadu rahun, uma kain barak lakon rendimentu loron. loron,”dehan Jorge.
Vendedór sira tuir nia ohin loron sei tur de’it iha lona okos, haree hela fatin ne’ebé uluk rame tebes. Maski nakukun, sira sei iha esperansa ki’ik ida katak governu sei la taka matan.
“Se governu hakarak ajuda, labele fó de’it osan emerjénsia $200. Presiza harii merkadu foun ne’ebé seguru, ho instalasaun eletrisidade ne’ebé loos, dalan ba karreta bombeiros tama, no bee-matan. Se lae, ita hein de’it trajédia tuir mai,” Jorge de Oliveira hatutan.
Entretantu iha fatin akontesimentu, vendedór sira hahú hamoos rasik ahi kedesan ho liman mamuk. Sira nia mehi agora simples de’it, la’os atu sai riku, maibé atu hetan fila fali fatin ki’ik ida hodi fa’an, hodi fó han sira-nia oan aban.
Trajedia nakukun ne’e hanorin Ema hotu katak, merkadu la’os de’it fatin halo osan, maibé moris-fatin. Proteje merkadu, signifika proteje povu ki’ik nia moris.
(car)
