DILI, STLTIMORLESTE.com – Eis Prezidente Republika atual Prezidente Partidu FRETILIN, Francisco Guterres Lu Olo husu Primeiru Ministru, Kay Rala Xanana Gusmao neebe lidera Governu atu ukun povu tuir Lei, baku ou halo violensia hasoru vendedor laos solusaun.
Eis PR no atual Prezidente Partidu FRETILIN hatoo kestaun nee bainhira haree ekipa husi Sekretariu Estadu Assuntu Toponomia no Organizasaun Urbana SEATOU, neebe tun baku vendedor sira iha Kampu Baru no fatin seluk tan.
Eis Prezidente Republika hatete, povu hili atu ukun povu tuir lei no ordem, laos uza asaun violensia hasoru fali povu aileba sira.
“PM Xanana Gusmão povu hili ita boot sira atu ukun povu tuir lei no direitu. Saida mak ita boot nia subalternos sira halo ba vendedores sira, hatudu ita boot nia frakeza kaer ukun,” katak Prezidente Partidu FRETILIN liu husi komunikadu neebe publika iha Pajina Ofisial, Eis PR Lu Olo, Sesta (25/10/2024).
Volensia hasoru povu no vendedor tuir eis Prezidentente Republika nee katak, laos dalan atu rezolve problema, maibe ho asaun nee governu halo liu tiha ona ho folin ida neebe moruk iha rai doben Timor Leste nee.
“Violensia laos solusau nba problema, nem dalan ba solusaun. Maibe ita boot nia governu halo liu tiha ona ho folin ida neebe moruk liu hotu-hotu iha Timor Leste. Espera katak ita boot ukun ema no rai ho respeitu no ho dignidade,” katak Lu Olo.
Eis Xefe Estadu nee hatete, Governu neebe lidera husi Primeiru Ministru, Kay Rala Xanana Gusmao halo liu ona ho folin neebe moruk, nia mos iha esperansa lider sira bele ukun povu ho respeitu no dignidade.
(eme)
