DILI, STLTIMORLESTE.com – Belak no surik neebe tau iha uma lulik laos atu adora, maibe nuudar eransa husi avo beiala sira hanesan bukae ba jerasaun sira hodi hanoin no respeita nafatin.
Tuir Katekista Mario Soares katak, moris nuudar sarani katoliku neebe los, tenke tau fiar no konfiansa tomak bá Maromak, laos atu adora fali sasan ou buat seluk neebe la eziste iha santa kreda nia ukun fuan. Lulik eransa sira hanesan belak no surik neebe tau iha uma lisan nuudar eransa husi avo beiala sira para jerasaun sira atu hanoin no respeita nafatin sira, laos atu adora fali eransa lulik sira nee hanesan Maromak, basa Nai Maromak mak nain ba buat hotu.
“Ita nafatin respeitu lulik sira, belak no surik neebe tau iha uma lulik, sira nee nuudar eransa husi avo beiala sira uza hanesan bukae mai ita idak-idak hodi hanoin nafatin beiala sira. Sai sarani neebe diak no los fiar deit bá Nai Maromak, bá Maromak deit mak ita adora tanba Nia mak Nain bá kriatura tomak,” dehan nia bá STL iha Parokia Aimutin Komoro, Segunda (11/05/2026).
Nia afirma, atu sai sarani neebe diak iha moris lor-loron diak liu mak halo fiar sai bá kultura, tanba husi kultura neebe halo ema besik liu bá ho maromak.
Nunee Pe. Matias Mendonça Marsal de Jesus Sdb liu husi omilia hatete, kultura halo ema atu besik malu no respeita malu, ida neemak virtude Maromak nian, virtude neebe relijiaun katoliku hanorin mak ida nee.
Nia katak, kultura nee husi abut, husi Avo sira mak sai mai, neebe tenke hametin nafatin hodi respeitu malu. Tanba nee husi kultura halo ema Nia fiar mos sai abut hanesan nee para metin.
“Nee.mak dehan halo Ita nia fiar nee sai ita nia kultura, fiar ida neebe foun no tuan kahur hamutuk lori ita besik bá Maromak. Neebe Ita hanoin Nain Feto neebe halo buat tuan sai bá foun, lori ita bá maromak. Halo ita nia fiar sai kultura,tanba fiar liu kultural, duke fiar Maromak. Buat hotu nee Nai Maromak mak halo, kultura ita ema mak halo. Maibe dehan, ita hahu husi kultura lori ita besik bá Maromak,” tenik Padre nee.
Nia dehan, molok relijiaun katoliku mai iha nee, kultura iha ona. Avo sira seidauk hatene Maromak mak ida neebe, Avo sira hatene deit fatuk bot ho ai bot mak Maromak, maibe sira la buka tuir katak aihun ho fatuk nee semak halo. Sira too deit iha ai no fatuk deit, liu ida nee sira la hatene. Maibe ikus mai Maromak ida boot liu mak halo buat hotu -hotu, neebe Nai Jesus neebe Maromak neebe halo buat hotu-hotu lori ema ho kultura hamutuk besik liu bá maromak.
(dom)
