DILI, STLTIMORLESTE.com – Ministru Administrasaun Estatal (MAE), Tomas Cabral relata preparasaun ba eleisaun Prezidensial, nomos prosesu transladasaun restu mortais Monsehor Martinho Lopes ba Prezidente Republika, Jose Ramos Horta.
Bainhira remata hasoru malu, Ministru Administrasaun Estatal (MAE), Tomas Cabral ba jornalista sira iha Palasiu Prezidensial Nicolau Lobato, Bairo Pite, Kinta (06/08/2026) hatete, ohin mai halo enkontru ho Prezidente Republika Jose Ramos Horta hodi informa preparasaun ba Eleisaun Prezidensial nomos preparasaun ba transladasaun resto Mortais Monsenhor Martinho Lopes nia ba Xefe Estadu.
“Assuntu primeiru koalia konaba Eleisaun Prezidensial STAE nia preparativu CNE mandatu foun, hau informa ba Prezidente sira STAE preparadu hela atu servisu, Prezidente sei konvida sira ho CNE tanba STAE mos iha nia estatutu institutu publiku, nia jere nia osan rasik, nia jere nia atividade nee mak Prezidente sei bolu STAE ho CNE atu rona sobre preparasaun sira sei mai, segundu prezidente mos hakarak rona aktualizasaun sobre transladasaun monsehor Martinho Lopes ho bispu nain rua ho Amu Bispu Dom Ricardo informa ba Prezidente horiseik hau ho kardeal, PNTL ho F-FDTL ami ba too iha Aeroportu haree oinsa transladasaun nee atu too iha Dili, sei simu husi komponente parada Militar ho Polisia pois sei entrega ba iha Comferensia Episkopal Timor Leste, kongresaun igreza Katolika nia,” dehan Ministru MAE.
Ministru hatete, atividade sira nee sei divulga liu husi media, iha 18 Agostu, misa iha Igreja Esperito Santo Evora ho padre Timoroan sira sei prezide husi Bispu Dioseze Baucau, tanba daudaun nee saudozu sira nia ruin iha neeba hotu ona.
Depois husi igreja Esperito Santo Evora iha 18 Agostu sai ba Igreja Katedral Se Evora, iha neeba padre português sira mak organiza misa despedida, no Governu Timor Leste reprezenta husi Ministru MPIE hatoo agradesementu.
Iha 19 Agostu, depois misa Bispu Dioseze Baucau fila kedas mai Dili, misa hotu transladasaun sira nee lori ba Lisboa, no 22 Agostu seladu haruka mai Dili.
Ministru hatete, ohin mai konvida mos Prezidente Republika atu partisipa, no bainhira Governu simu tiha ho parada militar sei entrega ba Igreja Katolika lori ba Tasi-Tolu, no iha 2 Setembru, Monsenhor Martinho Lopes sai husi Tasi-Tolu ba Laleia rai ida neebe monsehor moris ba, ida nee desizaun neebe Governu halo hamutuk ho Igreja. Dia 2 Setembru hela iha Laleia dia 3 Setembro, iha oras tuku 9:30 dader, sai husi Laleia mai iha Ponte Manatutu tau omenajen ba Monsehor Martinho Lopes.
Too iha Manatutu, sarani Manatutu simu tiha iha minutu balun no sarani sira sei oferese lembransa ba CET no entrega ba Igreja serimonia solene ba Prezide husi Prezidente Republika lao nafatin, no iha dia 3 Setembru sei fo omenajen ba Monsenhor Martinho Lopes iha Ponte Manatutu.
Iha loron 4 Setembru lori husi Manatutu mai Dili, husi nee ba Laleia liu husi Bekora, no fila husi Laleia mai Tasi-Tolu liu husi Kristu Rei, no sei para minutu ida rua iha rezidensia Episkopal Lecidere, depois sei lori ba nia rezidensia Lahane, husi Lahane tun mai Balide misa, depois ba Tasi-Tolu,” dehan nia.
Nia hatete, dia 31 Agostu agora Igreja sei organiza ruin balun lori daudaun ona ba Tasi-Tolu no dia 5 Setembru ba oin Igreja organiza atividade iha Tasi-Tolu, ruin sira iha neeba hotu ona dia 9 Setembru dader inaugural monumentu iha Igreja Katedral kotuk no dia 9 loraik inaugural Muzeum Papa João Paulo II iha Tasi Tolu, no iha loron 10 Setembru, iha oras tuku 5 loraik sei iha misa iha Tasi Tolu no restu mortais sira nee sei lori hotu mai Katedral halot iha Katedral.
“Iha Katedral laran iha mos monumentu ida omenajen ba padre sira, iha liur sarani sira bele hela nafatin iha Tasi-Tolu tanba transmisaun direita, parokianu sira katedral iha neeba para lori halot iha dia 10 Setembru, iha dia 10 Setembru halot restu mortais haat, ita komemora mos tinan 2 Papa Francisco Vizita Timor Leste,” katak Ministru.
Ministru hatete, iha dia 10 Setembru, Prezidente Republika sei hatoo diskursu no iha Munisipiu Manatutu mos serimonia Estadu nia Prezidente mak sei prezide liu husi diskursu.
Nia hatutan, serimonia 30 Agostu sei halao iha Munisipiu Manatutu, 20 Agostu halao iha Munisipiu Baucau, no 30 Agostu loron referendum halao iha Manatutu no 3 setembru omenajen iha Manatutu.
“Ohin hau dehan tiha ona, Governu sei simu husi aviaun entrega ba parada Militar no polisia Militar konjunta despois sei entrega ba igreja Katolika hodi lori ba Tasi Tolu durante dia 1 setembru too dia 10 mak foin halot,” hakotu.
(eme)
