DILI, STLTIMORLESTE.com – Makau reafirma prontidaun atu apoia dezenvolvimentu ekonómiku Timor-Leste nian, inklui kooperasaun komersiál, edukasaun no formasaun funsionáriu públiku.
Prezidente Asembleia Jerál Asosiasaun Traballadór Funsaun Públika Makau, Rita Santos hato’o deklarasaun ne’e ba jornalista sira, bainhira remata enkontru ho Prezidente Repúblika José Ramos Horta iha Palásiu Prezidensiál Nicolau Lobato, Bairo Pité, Sesta (09/10/2026).
Rita Santos esplika katak, nia koñese di’ak Prezidente Repúblika José Ramos-Horta desde 2003, bainhira Makau kria Fórum Kooperasaun Ekonómika entre Xina no nasaun sira ne’ebé ko’alia lian Portugés.
Fórum ne’e sai plataforma importante ida atu hametin relasaun ekonómika entre Xina no nasaun sira ne’ebé uza lian Portugés, inklui Timor-Leste.
“Durante tinan 20 nia laran, ema Timoroan sira ne’ebé servisu iha funsaun públika ka emprezáriu partisipa iha atividade oioin, inklui enkontru no atividade negósiu,” dehan Rita.
Nia hatete katak, desde 2003 to’o agora, Makau kontinua odamatan nakloke atu hametin parseria ho Timor-Leste, liuliu iha área dezenvolvimentu ekonómiku no kriasaun empregu.
“Husi tinan 2003 to’o agora, Makau iha nia odamatan nakloke hodi kontinua haree parseria ho ema Timoroan sira, tantu kona-ba apoiu ba dezenvolvimentu ekonómiku Timor-Leste nian no kriasaun empregu,” dehan Rita.
Rita mós temi kontribuisaun Padre Fernandes ba Timor-Leste durante tempu invazaun, ne’ebé ajuda ema Timoroan sira, inklui sira ne’ebé ba Makau.
“Atu konklui, ho liafuan badak, Makau amigável tebes. Ami iha asosiasaun belun sira iha Makau,” nia dehan.
Nia subliña katak, kooperasaun ekonómika no komersiál entre Makau no Timor-Leste presiza kontinua, atu fó asesu ba merkadu Xina no hametin relasaun entre komunidade emprezáriu sira.
Rita esplika katak, Makau iha pozisaun estratéjika atu sai ponte entre Timor-Leste no merkadu Xina, liuliu liuhusi ligasaun ho rejiaun Greater Bay Area.
Nia konsidera katak, uza lian Portugés nu’udar lian ofisiál iha Makau bele fasilita komunikasaun entre Timoroan sira no parseiru sira iha Makau.
Nune’e mós Prezidente Asosiasaun Traballadór Funsaun Públika Makau, José Pereira Coutinho, mós hato’o agradese ba Prezidente Repúblika tanba simu sira-nia vizita.
José Pereira Coutinho hatete katak, enkontru ne’e sai oportunidade atu ko’alia kona-ba kontribuisaun Makau ba dezenvolvimentu Timor-Leste, liuliu iha edukasaun no formasaun pesoál funsaun públika.
“Saida mak ami hakarak mak kontribui ba dezenvolvimentu Timor-Leste nian, partikularmente iha área edukasaun no formasaun pesoál funsaun públika,” dehan José.
Nia esplika katak, Timor-Leste no Makau iha esperiénsia komún iha área lejislasaun, inklui sistema legál ne’ebé iha influénsia husi Portugál.
José mós hatete katak, Rita Santos vizita Timor-Leste dala barak ona no iha kompromisu atu kontinua fó apoiu ba dezenvolvimentu nasaun ne’e.
Nia konsidera katak, kooperasaun entre Timor-Leste, Makau no Xina presiza akompañamentu kontinua atu asegura rezultadu konkretu.
“Importante tebes atu halo akompañamentu tuir mai hodi bele hetan rezultadu, tanba iha pasadu ita iha esperiénsia barak iha formasaun ba pesoál Timoroan sira, partikularmente iha área jurídika,” nia dehan.
José hatutan katak, advogadu Timoroan balu hetan ona formasaun iha Universidade Makau, ne’ebé sai ezemplu ida husi kontribuisaun kooperasaun edukasionál.
Nia husu atu parte sira kontinua hametin amizade, kooperasaun profisionál no oportunidade formasaun, hodi kontribui ba hasa’e kualidade moris sidadaun Timoroan.
(eme)
