DILI, STLTIMORLESTE.com – Makina CT Scan neebe avaria durante fulan ida nia laran, daudaun nee hahu halo ona manutensaun husi tekniku espesializada CT Scan sira husi rai liur.
Tuir komunikadu imprensa neebe STL asesu husi media HNGV, Kinta (20/08/2026) hatete, iha loron Kuarta (19/08/2026) Diretor Ezekutivu no Prezidente Konsellu Diretiva HNGV, Nuno Vital Soares, hamutuk ho membru konselhu diretiva halo vizita ba Departamentu Radiologia hodi obeserva servisu kompanhia OCEANO, Lda neebe halo manutensaun ba makina Computed Tomography Scan (CT Scan).
Iha vizita nee Diretor Apoiu Diagnostiku no Terapeutiku HNGV, Vidal de Jesus Lopes hateten, makina CT Scan neebe avaria durante fulan ida, daudaun nee hahu halo manutensaun husi tekniku espesializada CT Scan sira husi rai liur.
Nia hatutan, durante makina CT scan avaria, HNGV nafatin fo atendimentu ba pasiente sira uza alternativu seluk mak hanesan utiliza makina Magnetic Resonance Imaging (MRI), Raio-X no ultrasonography (USG).
Diretor nee afirma, tinan 2026, HNGV se sosa tan makina CT Scan foun ho nia kapasidade atus ida rua nulu resin ualu fatia (128 slice).
“Tinan ida nee, HNGV tau ona osan ba kompanhia manan nain hodi fornese makina foun CT SCAN, makina foun se too iha HNGV fulan oin, signifika makina HNGV hamutuk rua ona ho nia kapasidade la hanesan, CT scan 24 slice no CT scan 128 slice,” dehan nia.
Iha vizita ida nee akompanha mos husi Diretora Administrasaun Finansas, Logistica no Aprosionamentu HNGV, Silvia Izina A. Belo Ximenes, Diretor Kompanhia OCEANO ho Ekipa no Xefe Departamento Radiologia.
(dom)
