DILI, STLTIMORLESTE.com — Olivio Barros, nu’udar mandatáriu husi juiz na’in haat (4), kontesta tentativa atu hasai ekipamentu no prosesu judisiál husi gabinete juiz sira, ne’ebé nia konsidera la tuir prosedimentu administrativu.
Nia ko’alia ba jornalista sira iha Tribunál Dili Kuarta-feira, kona-ba akontesimentu ne’ebé envolve membru Korpu Seguransa Pesoál (CSP) no Administradór Tribunál Dili.
Tuir informasaun inisiál ne’ebé simu husi nia kliente, membru CSP sira, hamutuk ho Administradór Tribunál Dili, tenta hasai ekipamentu no dokumentu husi gabinete juiz na’in haat, maibé tentativa ne’e la konsege.
“Atuasaun ida-ne’e la tuir prosesu, la tuir prosedimentu, no la tuir prátika administrasaun servisu tribunál nian,” dehan Olivio.
Nia hateten katak, asaun ne’e hamosu solidariedade entre juiz sira, tanba konsidera atuasaun ne’e la tuir prosedimentu ne’ebé normalmente aplika iha administrasaun tribunál.
Olivio subliña katak, ema ne’ebé ezekuta orden tenke verifika uluk kompeténsia no baze legál orden ne’e, maski mai husi autoridade superior.
“Estadu direitu labele halo sasan tuir ita-nia hakarak; tenke hatene mekanizmu no haree orden ne’e tuir lei ka lae,” nia afirma.
Kona-ba posibilidade krime, Olivio hateten katak sei verifika se iha indikasaun atuasaun kriminal. Nia mós temi posibilidade prosesu disiplinár no kriminál hasoru ema sira ne’ebé envolve, tuir lei ne’ebé aplika.
Nia esplika katak, investigasaun sei determina identidade ema sira ne’ebé partisipa, sira-nia estatutu, no se sira simu duni orden husi Prezidente Tribunál Rekursu.
“Tenke verifika orden ne’e eziste duni ka lae, no se nia lejítimu tuir lei,” dehan Olivio.
Nia hateten katak sei hala’o reuniaun ho juiz sira, inklui juiz na’in haat ne’ebé transfere, no husu ba autoridade kompetente atu foti desizaun tuir prosedimentu legál.
Olivio mós husu ba Konsellu Superiór Majistratura Judisiál (KSMJ) atu analiza reklamasaun ne’ebé juiz sira hato’o ona no foti desizaun lalais.
Kona-ba transferénsia juiz sira-nian, nia hateten katak desizaun tenke tetu didi’ak, tanba iha prosesu judisiál balu ne’ebé juiz sira ne’e kaer hela.
Tuir observasaun STL nian iha Tribunál Dili, Kuarta-feira dadeer (14/10/2026), mosu preokupasaun no protesta husi juíz balu kona-ba tentativa hasai sasan husi gabinete juiz sira.
Maibé, depois de minutu balu, juiz sira ida-idak kontinua hala’o knaar, inklui atividade judisiál iha tribunál.
(ter)
