DILI, STLTIMORLESTE.com – Manorin nain sira orgulhu ho formasaun sira neebe governu liu husi Ministériu Edukasaun (ME) kria bá eskola hotu, tanba ho formasaun sira nee hanesan esforsu governu nian hodi hasae kualidade edukasaun iha TL. Liu husi formasaun sira nee, buat ida neebe diak tebes hodi aumenta kapasidade no konhesimentu profesor sira hotu.
Tuir Profesor Fransisca da Costa katak, futuru nasaun nian atu diak presiza labarik no joven kontinuador neebe matenek, tanba nee hahu agora tenke servisu makaas hodi hasae kualidade edukasaun iha rai laran, para nunee estudante sira hanesan jerasaun kontinuador bele halo diak liutan bá rai ida nee no lori nasaun TL nia naran bá iha mundu.
Nia katak, neebe ho formasaun sira neebe governu kria, nee hanesan esforsu diak hodi hasae kualidade edukasaun nian. Liu husi formasaun sira manorin nain sira bele haklean liutan sira nia konesementu no kapasidade. Tanba depois formasaun, manorin nain sira mai aplika fali bá estudante sira iha eskola sira.
“Nuudar manorin nain hau orgulho ho IX Governu ida nee nia servisu no esforsu hodi hadia kualidade edukasaun nian. Ita nia desenvolvimentu edukasaun nian mos komesa lao diak ona, espera bá oin sei bele lao diak liutan. Neebe tau fiar nafatin bá ita nia governu ida nee, fiar katak bá oin sei halo diak liutan bá setor edukasaun, liu-liu hadia kualidade edukasaun iha rai laran,” dehan nia ba STL iha Balide, Tersa (02/06/2026).
Nia afirma, haree ba infraestrutura eskola sira komesa lao dadaun, eskola aumenta tan iha fat-fatin, professora sira mos komesa hanorin too iha fatin rural sira, maske fatin balun seidauk bele too hotu maibe fiar katak bá oin sei diak liu tan.
Diretora EBC Farol, Brigida Faustina Soares Guterres Coelho hatete, labarik no joven sira mak jerasaun kontinuador ba nasaun ida nee nian, oinsa atu hasae kualidade edukasaun nee ho diak para nunee aban bainrua sira bele lori liu tan asaun nee bá iha mundu, nunee mundu mos rekonhese katak TL mos bele.
Nuudar manorin nain esperansa bá oin mak hakarak hasae kualidade edukasaun nee tenke diak, tanba dadaun nee manorin nain sira mos agora esforsu aan hotu hodi hasae kualidade edukasaun ho diak.
“IX Governu nee halao formasaun bá profesor hotu, agora mos atu implementa dadaun ona kurikulum foun iha setimo ano. Nee hanesan esforsu ida neebe governu nee halo diak bá profesor sira hodi aumenta kapasidade no konesementu bá manorin nain sira hotu. Neebe formasaun neebe mak governu kria nee, buat ida neebe diak tebes hodi kapasita profesor sira hotu,” katak nia.
Nia hatutan, daudaun nee manorin nain sira barak mak bá tuir formasaun hodi mai aplika fali iha eskola sira, atu nunee bele hasae kualidade edukasaun iha kada eskola sira, tanba ida neemak ema hotu nia esperansa.
(dom)
