DILI, STLTIMORLESTE.com – Prezidente Fundasaun Pigu de Caridade, Manuel Pinto hateten, iha tempu ohin loron nia matenek labele ho foti aan, maibe matenek tenke ho haraik aan ka halo ema humilde.
Lia hirak nee hatoo husi Prezidente Fundasaun Pigu de Caridade, Manuel Pinto, wainhira halo abertura ba seminariu sientifiku iha salaun IPBJ Komoro, Sesta (11/04/2025).
“Tempu ohin loron nian matenek labele foti aan, matenek nee halo ema haraik aan ka halo ema humilde, orador orsida lori materia nee depois halo furak liu tan maibe hau promove lema tolu institutu nian, matenek iha siensia, matenek iha esperiensia no matenek iha ispiritual,” katak Manuel.
Nia haktuir, iha materia Filosofia hanorin ita sai ema neebe matenek no aprende oinsa mak ita sai ema neebe domin nain hanesan Prezidente Fundasaun Pigu de Karidade neebe harii institutu ida nee ho nian lema tolu nee.
“Iha seminariu loron ida ohin nee filosofia ida neebe mak atu liberta estudante sira atu hanorin ema no matenek ida neebe atu eduka ema, eduka estudante sira atu bele liberta sira nia aan,” tenik nia.
Nunee husu ba iha orador no mos ba partisipantes sira hotu seminariu ho topiku ida nee hakarak atu lori ita hotu oinsa mak sai ema neebe mak matenek iha siensia no teknolojia iha dezenvolvimentu oin-oin.
“Ita haree fatores rua ka tolu, ida koalia kona-ba dezenvolvimentu vida humana, imi nia aan imi la moris mesak, imi presiza ema neebe mak akonpanha imi, primeiru ema neebe mak akonpanha imi mak inan ho aman, estudante sira lases husi inan no aman,” nia akresenta.
Prezidente Fundasaun Pigu de Karidade, Manuel Pinto mos enkoraja estudante sira hotu hodi sai nafatin estudante ida neebe mak domin nain no labele foti aan.
“Tanba nee hau enkoraja no motiva imi atu aproveita didiak seminariu ida ohin nee atu sai ema neebe mak matenek no domin nain, ema neebe domin nain nee ema neebe mak humilde la foti aan no la koalia aat ema, la tolok no la hirus,” katak nian.
Nunee edukasaun neebe mak fo ba sira liu husi seminariu ida nee hakarak atu dehan ba estudante sira, iha fatin neebe deit mak imi iha ba nee hanesan fatin estuda nian.
(EST 2)
