DILI, STLTIMORLESTE.com — Masin Fatuk Boxing Club kontinua fó treinamentu regular ba boxista sira husi idade 14 to’o 40 atu hasa’e kapasidade no prepara ba kompetisaun nasional no internasionál.
Masin Fatuk Boxing Club lokaliza iha Suku Santa-Ana, Postu Administrativu Cristo Rei, Munisípiu Dili, fó treinamentu regular ba labarik, joven no adultu sira ne’ebé iha interese atu dezenvolve kapasidade iha modalidade boxing.
Treinador Masin Fatuk Boxing Club, João Almeida, hateten klubu ne’e foka liu ba kapasita foinsae sira ne’ebé iha interese atu sai boxista. Treinamentu hala’o iha fatin treinamentu boxing iha Bidau Toko Baru.
“Ami iha treinador ida no assistente treinador ida. Ami sempre fó treinamentu ba labarik no foinsae sira ne’ebé hakarak sai boxista, atu sira bele dezenvolve kapasidade no sai boxista profisionál,” João Almeida hateten.
Tuir nia, Masin Fatuk Boxing Club iha besik boxista 110 ne’ebé regularmente partisipa iha treinamentu. Sesaun treinamentu hala’o husi Segunda to’o Sabadu, komesa tuku 18.00 to’o tuku 20.00.
Bainhira iha kompetisaun, klubu sei hili boxista sira tuir sira-nia kapasidade no prestasaun durante treinamentu atu reprezenta klubu iha eventu boxing.
João Almeida hateten katak, boxista sira ne’ebé partisipa iha treinamentu iha idade diferente, komesa husi tinan 14 to’o 40.
“Agora ami fó treinamentu ba foinsae sira ne’ebé mai halo treinamentu iha Masin Fatuk Boxing Club, ho idade komesa husi tinan 14 to’o tinan 40,” nia hateten.
Ho kontinuidade treinamentu no dezenvolvimentu klubu boxing iha Timor Leste, João Almeida espera katak joven sira ne’ebé iha talentu bele hetan oportunidade atu dezenvolve sira-nia kapasidade no, iha futuru, hametin naran Timor Leste iha kompetisaun boxing nasional no internasionál.
(leo)
