DILI, STLTIMORLESTE.com – Relasiona kazu neebe membru Polísia Nasional Timor Leste (PNTL) tiru Silvano Gomes la uza kapaseti iha Suku Irabin de Baixo, Postu Admimistrativu Uatocarabau, Munisipiu Viqueque, mate isin autopsia hotu ona no rezultadu autopsia Hospital Nasional Guido Valadares (HNGV) entrega ona Tribunal Baucau.
Xefe Departamentu Forensik iha Hospitál Nasionál Guido Valadares (HNGV), Nilton Tilman hatete, ho kazu neebe mak deskonfia PNTL tiru mate joven ida ho naran Silvano Gomes, iha loron 15 fulan Agostu tinan 2025, dadaun nee HNGV entrega ona ba família no rezultadu autopsia sei entrega ba Tribunal Baukau.
Nia dehan, konaba rezultadu autopsia ba matebian Silvano Gomes neebe deskonfia Membru PNTL tiru mak halo hotu ona autopsia no rezultadu sei intrega ba Tribunál Baukau.
“Tuir planu nee mate isin sei tula sai tuku 5:00 dader, husi HNGV atu ba haloot iha Uatucarbau, neebe autopsia hotu ona no intrega ona, no orsida familia lori ba misa iha kapela HNGV, depois mai rai fali iha Mortuariu no aban mak lori ba liu, neebe oras ida liu ba, hahu jam 3 hotu jam 4 no relatoriu sei prontu, maizumenus loron lima sei submete ba tribunal Baukau,” hatete Xefe Departamentu Forensik iha Hospitál Nasionál Guido Valadares (HNGV), Nilton Tilman ba jornalista sira via WhatsAppp, Kuarta (19/08/2026).
Iha fatin hanesan, molok nee tuir família matebian Elizario da Silva katak, reprezentante família Elizario da Silva rekonhese deklarasaun husi vítima rasik katak, nia rasik iha momentu neeba halo movimentasaun la uza duni kapasete, hodi hetan tiru husi oknum polísia balun, maibe informasaun nee seidauk klaru tanba seidauk iha prosesu.
“Informasaun katak, vítima la uza kapasete mak hetan tiru husi polísia nee loos, hau mós haruka duni ninia maun ba koalia ho nia selagi nia iis sei iha, nia mos dehan duni hau la tau kapasete loos. Maibe husik ba Tribunal mak prosesu ita rona deit, maibe hau mos rona duni katak nia la uza duni kapasete nee loos,” nia informa.
Nia tenik, vítima daudaun nee mate ona tanba nee hanesan família hakarak atu prosesu ne’e tenke bazeia ba lei neebe iha. Nunee desizaun tomak família entrega ba iha Tribunal hodi deside se mak sala se mak loos, nunee Tribunal mak sei deside iha prosesu tuir mai.
“Mate ona klaru ami família ninia hakarak prosesu nee tenke tuir lei karik matebian maka atu sala mos laiha buat ida mais prosesu nee tribunal maka deside, neebe ami família nia hakarak maka buat hotu-hotu tenke lao tuir lei. Karik lei dehan nia mate ona ida tiru nee la kastigu mos ita labele halo buat ida, nee lei maka haruka, se lei dehan tenke kondena nia klaru ita tenke prosesu nia,” nia esplika.
Elizario haktuir, família foti ona desizaun hodi prosesa mate isin ba autopsia, hodi nunee bele hetan evidensia ruma, hodi kontinua ba prosesu investigasaun.
“Prosesu ba tanba ohin polísia mai ona koalia ho hau atu autopsia, hau autoriza autopsia para bele hetan evidensia ruma karik prosesu nee lao ba oin, maibe ami família nia eziji mak tenke tau lei nee tuir ninia koridor sala nee tenke sala, ida loos nee tenke loos ami família nia eziji maka nee de’it,” nia koalia.
Nunee mos Portavos Uniaun Estudante Universitariu Munisipiu Viqueque, (UEUMV), Apolinario da silva, relata Relasiona ho kazu oknum PNTL utiliza patrimoniu estadu ka arma branka hodi akuza ba sidadaun ida iha Postu Uatu-carbau, Suku Irabin de Baixo, Munisipiu Viqueque, iha loron 15 de agostu 2026, iha tuku 8:30 dader.
Nunee UEUMV dununsia lamentasaun ba publiku, konaba kazu membru PNTL utiliza arma branka tiru hasoru sidadaun ho naran inisial SG ho idade 30 iha Postu Uatucarbau, Munisipiu Viqueque. Vitima refere hetan tiru husi oknum PNTL too kondisaun kanek gravida husi parte liman karuk kuak too borus.
Nia koalia, haree husi asaun PNTL nee konsidera aktu krimanal no imkuprimentu ba misaun PNTL, tanba sira nia misaun neebe mak hatuur ona iha lei organika PNTL no Dekreto-Lei 55/2022, 3 de agosto iha klauzula 5, misaun PNTL Maka Atu defende legalidade demokratiku garante seguransa ba sidadaun ho seguru tuir konstituisaun KRDTL. Tanba nee iha prinsipiu estadu direitu demokratiku, lei tranzitu iha objetivu fundamental atu garante seguransa, ordem, no disiplina iha estrada nunee PNTL tenke halao asaun tuir legalidade atu hamosu infrasaun tranzitu labele transforma ka justifika kedan ba uza arma ka violensia fizika, bainhira sidadaun sira kontra lei tranzitu no kodigu estrada julga tuir lei, laos uza arma estado hodi hakanek ninia povu.
“Tuir lei nu.6/2003 03 abril, konaba kodigu transito rodaviariu, iha klauzula ida nee hateten katak bainhira parte seguransa halao misaun hodi halo servisu atu organiza transporte publiku tantu privadu, tenke transparante, imparsialiadade, legalidade no justu ba nia sidadaun. Laos pntl utiliza arma branka akuza sidadaun ho asaun bandalismo no brutalismo hanesan tiru ka hamate, nee konsidera pratika burtalismu no bandalismu hasoru sidadaun,” nia afirma.
(jen)
