DILI, STLTIMORLESTE.com – Ministru Defeza (MD), Donaciano do Rosario Gomes liu husi enkontru Konselhu Ministru (KM), aprezenta projetu konstrusaun ba Hospital Militar FALINTIL-Forsa Defeza Timor Leste (F-FDTL) nian, nee sei dezenvolve liu husi servisu kooperasaun bilateral entre nasaun Timor Leste (TL) ho Republika Popular Xina.
Tuir Ministru Defeza (MD), Donaciano do Rosario Gomes ba jornalista sira iha Palasiu governu, Kuarta (01/07/2026 katak, misaun teknika xineza neebe responsavel ba serbisu preparasaun ba projetu nee, aprezenta karakteristika prinsipal ba futuru Hospital Amizade TL ho Xina. Hospital nee sei harii besik iha MD no Kuartel-Jeneral F-FDTL, iha Dili.
Nia dehan, projetu nee inklui ospital jeral ida ho kapasidade kama 100, area maizumenus metru kuadradu 10.500, edifisiu prinsipal ida ho andar 8, nomos edifisiu apoiu sira, neebe kompleta ho teknolojia medika moderna no preparadu atu fornese servisu konsulta esterna, kuidadu emerjensia, internamentu, imajiolojia, analizes klinikas no kuidadu intensivu.
Aleinde nee, Ministru Donaciano do Rosario Gomes aprezenta kriasaun Komisaun Interministerial, ida hodi halo supervizaun no halo akompanhamentu ba Konstrusaun Futuru Ospital Militar nee.
Projetu estratejiku ida nee ho objetivu atu reforsa kapasidade operasional F-FDTL, komplementa servisu sira Servisu Nasional Saude nian, hadia resposta ba emerjensia, katastrofe no krize umanitaria, promove formasaun no dezenvolvimentu medisina militar, hamenus dependensia ba tratamentu sira iha rai liur, nomos fo benefisiu ba populasaun sivil, hodi kontribui ba reforsu kapasidade nasional iha area saude no dezenvolvimentu ekonomiku nasaun nian.
(jos)
