DILI, STLTIMORLESTE.com – Governu liu husi Ministeriu Defeza asina akordu implementasaun ba konstrusaun ba Hospital Militar FALINTIL-Forsa Defeza Timor Leste (F-FDTL) nian, nee sei dezenvolve liu husi servisu kooperasaun bilateral entre nasaun Timor Leste (TL) ho Republika Popular Xina.
Ministru Defeza (MD), Kontra-Almirante Donaciano Costa Gomes “Pedro Klamar Fuik” dehan, konstrusaun Hospital Xina amizade TL, tanba nee foin daudaun asina termus de implementasaun ba hospital neebe mak atu konstrui.
“Hanesan ita boot sira hatene hospital ida nee ho kustu dolar karik $20 milhões ital, nee investmentu neebe boot tebes, husi ita nia maluk Xina nian para fo ba Timor oan sira, hanesan solidaridade ba ita,” hatete Ministru Defeza (MD), Kontra-Almirante, Donaciano Costa Gomes “Pedro Klamar Fuik” ba jornalista sira wainhira hasoru malu ho Embaixador Xina iha TL, iha Salaun MD Fatuhada Dili, Kinta (02/7/2026).
Nia esplika, prosesu ida nee lao too agora nomos daudaun faze asina akordu implementa, depois iha ona ekipa konsultor para atu finaliza dezenhu sira sei fila.
“Ita sei ba konkorda ho sira no haree ba dezenhu neebe sira finaliza ona nee, depois halo konkursu no halo kontrusaun, dala ruma sei tinan ida nee ou tinan oin,” nia deklara.
Iha fatin Embaixadora Xina iha Timor Leste, Wang Wenli deklara, asina akordu implementasaun hospital amizade Xina entre TL. Projetu Hospital Amizade Xina ho TL hetan konkordansia husi líder nasaun rua nee.
Nia informa, projetu nee hetan konfirmasaun durante enkontru entre Prezidente Xi Jinping no Prezidente José Ramos Horta iha Pekin, sira koalia mos durante vizita Primeiru Ministru (PM) Kay Rala Xanana Gusmão ba Hangzhou.
“Hau atu dehan katak, projetu ida nee reflete kompromisu no konkordánsia neebe fahe husi líder Xina no TL hodi hametin kooperasaun iha setor saude,” nia koalia.
Nia esplika, durante vizita ba Hangzhou, parte rua reafirma sira nia kompromisu atu implementa konsensu neebe lider Xina no TL hetan ona.
“Hahu kedas projetu nee, ami mantein kooperasaun neebe besik no produtivu ho Ministeriu Defeza Timor Leste no instituisaun governu nian sira seluk neebe relevante. Tanba nee, ami nia ekipa peritu sira kompleta ona servisu dezenhu preliminár ba projetu,” nia hatutan.
Nia argumenta, faze tuir mai sei inklui preparasaun dezenhu detallu, dezenhu konstrusaun no dokumentasaun téknika sira seluk. Bainhira sira nee finaliza ona, sei kontinua ho prosesu lisitasaun nian hodi hili kontratór konstrusaun nian, tuir fali ho prosedimentu administrativu sira seluk molok konstrusaun hahu.
“Ami sei kontinua aselera implementasaun projetu nian hodi asegura katak, ida nee lao lalais liu tan, ami kontente katak Sua Exelénsia Ministru Defeza mos fahe espetativa hanesan no hein katak Hospital Amizade Xina ho Timor Leste sei kompleta iha oportunidade lalais liu,” nia afirma.
Entretantu informasaun neebe STL asesu katak, hospital nee sei harii besik iha Ministeriu Defeza no Kuartel Jeneral F-FDTL Fatuhada, Dili, depois projetu nee inklui hospital jeral ida ho kapasidade kama 100, area maizumenus metru kuadradu 10.500, edifisiu prinsipal ida ho andar 8, nomos edifisiu apoiu sira, neebe kompleta ho teknolojia medika moderna no preparadu atu fornese servisu konsulta esterna, kuidadu emerjensia, internamentu, imajiolojia, analizes klinikas no kuidadu intensivu.
(jen)
