DILI, STLTIMORLESTE.com – Ministra Edukasaun (ME), Dulce de Jesus Soares enserra workshop nasional kona-ba kompetensia no hanorin minimu ba profesor sira.
Liu husi informasaun neebe asesu husi pajina ME, Sesta nee (17/04/2026), Ministra Dulce de Jesus Soares hatete, sente kontente tebes haree atividade nee tanba durante nee bainhira koalia kona-ba kompetensia profesór sira nian, sempre koalia kona-ba domíniu iha lian ofisial, domíniu sientífiku, pedagojia no etika profisional.
“Ema hotu iha Ministeriu Edukasaun kuaze hatene maibe ita haree ba kompetensia nee presiza haree saida maka profesor sira iha, liga ho kompetensia sira-neebe estabelese ona, karik atu fo formasaun bele fi ba ida neebe seidauk domina,” dehan nia iha Hotel Palm, Fatuhada, Kinta nee.
Entretantu, Prezidente INFORDEPE, Domingos Martins hateten, profesor sira tenki hatene kompetensia 4 neebe maka iha, liu-liu domíniu lian ofisial tantu tetun ho portuges maka profesor tenki hatene lee, koalia no hakerek diak, no dominu sentífíku no dominiu pedagójiku no inklui mos etika profisional.
“Ita haree mos ita-nia dezenvolvimentu sekulu 21 nian iha dominiu balu mais ita presiza haree didiak ba futuru oinsá maka ita-nia manorin sira bele haree diak liutan iha kuadru kompetensia nian,” dehan nia.
Atividade workshop nee pattisipa husi reprezentante dosente UNTL, Marista, parseiru sira husi UNICEF, UNESCO no dirijente Ministeriu Edukasaun nian.
(jac)
