DILI, STLTIMORLESTE.com – Ministeriu Edukasaun (ME) kontinua esforsu hadia problema insfraestrutura eskola, no sei kontinua halo rekrutamentu ba profesores foun.
Tuir Ministra Edukasaun (ME), Dulce de Jesus Soares informa ba jornalista iha City 8 Manleuana, Dili, Sesta nee (24/04/2026).
“ME sei kontinua esforsu atu hadia ita nian infraestrutura, nunee mos atu rekruta profesor hodi eskola sira bele hetan profesor, maibe ikus liu buat neebe mak sei fo impaktu boot liu ba estudantes sira mak ita profesor sira rasik nian, prioridade boot liu mak atu hadia eskola sira nee, tanba xavi mak professor,” nia esplika.
Nia dehan, se profesor ida mak matenek no hatene jere situasaun sira nee, dala ruma tenke halo aula reforsu, haree estudantes nee halo duni trabalhu ka lae, buat sira nee hotu mak bele ajuda estudantes nee matenek.
Iha parte seluk, Diretor Servisu Edukasaun Munisipiu Ainaro, Patricio da Costa Magno hatete, kona-ba ekipamentus pratika nian iha ensinu tekniku vokasional nee kompletu hela para estudantes sira bele halo pratika, depois de simu teoria husi profesores, sira bele halo pratika, liga ba infraestrutura eskola nian nee tekniku sira sukat ona, dadus iha hotu ona, hein planu orsamentu husi ME.
“Difikuldade neebe mak ita nian eskola sira iha Ainaro enfrenta nee mak problema infraestrutura eskola no rekursu, infraestrutura mos eskola balun deit, laos eskola hotu-hotu, tanba eskola balun mak seidauk diak, sala de aula ba ita nian estudantes sira seidauk sufisiente, inklui kondisaun eskola neebe presiza atu hadia, nee manorin edukasaun pre eskolar no sekundariu ifa,” dehan Patricio.
Entretantu Diretor Servisu Edukasaun Munisipiu Bobonaro, Miguel Freitas hatete, tinan ida nee SEM Bobonaro nafatin identifika kondisaun infraestrutura eskola, maibe tanba daudaun nee udan hela, depois mak ami sei halo kontinuasaun, ita nian eskola 13 nee pre eskolar hotu.
“Iha tinan kotuk ami identifika ona ita nian ensinu pre eskolar hamutuk 13, husi numeru nee ualu halo konstrusaun foun no lima reabilitasaun, agora ba tinan ida nee ami nafatin identifika ita nian infraestrutura eskola, atu nunee ita bele hatene lo-loos katak, hira mak tama ba konstrusaun foun no hira ba reabilitasaun ninia,” nia deklara.
(jac)
One Response
Obrigadu barak, ba informasaun sira, iha Parte ida ne’e, Atan ha’u hanesan Profesór ida mo’s nebe hanorin iha Ensino Secundario Catolico São Francisco de Asisi Natarbora, Hakarak mo’s atu hato’o hela Problema nebe ami hasoru mak, hanesan :
1. Laiha Komputadór hodi Estudante sira pratika
2. Profesóres barak Teste liu ona no kontinua ba hanorin iha fatin seluk
3.no ami nebe mak hanorin oras ne dadaun fundasaun mak selu hela.
4. Mestri barak mak sai tamba Salario la suficiente
5. Agora mestri sira nebe reforma mak mai ajuda hela hanorin.
Total Estudante 250 ital mak agra activo hela.