LISBOA, STLTIMORLESTE.com – Ministra Edukasaun Republika Demokratika Timor – Leste, Dulce de Jesus Soares akompanha husi asesór Pedro Ribeiro Gonçalves no asesora Jacinta Hanjam Corbafo, halao vizita kortezia ba Camões – Institutu Kooperasaun no lian, iha Lisboa Portugál, hodi reafirma kompromisu Governu Timor-oan nian atu hametin kooperasaun iha área edukasaun, formasaun profesór no promosaun lian Português.
Durante enkontru, Ministra agradese tanba simu ho diak husi Prezidente Camões, Dra. Florbela Paraíba, tanba ho papel fundamental neebe instituisaun nee dezempeña ona durante tinan barak ba dezenvolvimentu sistema edukativu Timor-oan nian.
Iha nia intervensaun, Ministra Eduksaun (ME), Dulce de Jesus Soares dehan, relasaun entre Timor Leste ho Portugal harii iha istoria komun, valor sira neebe fahe ba malu no ligasaun kultural no linguístika neebe forte. Iha kontestu nee, nia destaka importánsia estratéjika lian português nian nuudar lian ofisiál estadu nian, administrasaun públika, lejizlasaun, ensinu no produsaun sientífika no akadémika iha Timor Leste.
ME Dulce rekonhese mos kontribuisaun Camões nian ba kapasitasaun dosente Timor-oan sira, ho destake espesial ba Projetu PRO-Português, neebe nia konsidera hetan rezultadu neebe merese rekonhesimentu no gratidaun. Maibe, nia salienta katak dezafiu boot sei iha, liu-liu atu haforsa kompetensia linguístika profesór foun sira neebe tama ba karreira dosente kada tinan.
Governante nee hanoin hikas katak, misaun téknika foin lalais nee husi INFORDEPE no Ministériu Edukasaun mai Lisboa permite retoma diálogu institusionál ho Camões no hahú reflesaun hamutuk kona-ba faze foun kooperasaun nian. Ho nune’e, nia reitera vontade firme Governu Timor-Leste nian atu kontinua servisu besik ho instituisaun portugeza ne’e hodi prepara programa kooperasaun foun neebe ajusta ba nesesidade atuál sistema edukativu timoroan nian.
Espetativa Ministériu Edukasaun nian mak durante tinan 2026 sei dezenvolve servisu tékniku sira neebe presiza ba konsepsaun no formalizasaun projetu kooperasaun foun, ho objetivu atu hahú nia implementasaun iha 2027.
Iha nia intervensaun nia rohan, Ministra Edukasaun reafirma apresiasaun kle’an Governu Timor Leste nian ba servisu neebe Camões dezenvolve ona no manifesta disponibilidade tomak atu kontinua hametin relasaun konfiansa, amizade no kooperasaun nee, ba benefísiu edukasaun, formasaun profesór no promosaun lian português.
(jac)
