DILI, STLTIMORLESTE.com – Ministériu Edukasaun (ME) liu husi Servisu Edukasaun Munisipiu Manatuto, husu direjente eskola sira atu fó atensaun máximu ba estudantes finalista, tanba tempu ba realizasaun Ezame Nasional no Ezame Lokal besik ona.
Diretor Servisu Edukasaun Munisipiu Manatuto, Luis Antonio Soares, hato’o informasaun ne’e ba STL liu husi via-telefone, Kuarta-feira (30/09/2026).
“Hau hanoin kona-ba preparasaun Ezame Nasional, husi parte Edukasaun Munisipiu rasik ita hala’o ona enkontru ho direjente eskola sira. Agora sira mos forma hela ekipa iha kada eskola no halo ona elaborasaun pontus Ezame Lokal sira,” nia afirma.
Luis hateten katak, total estudantes finalista iha Munisipiu Manatuto ne’ebé sei partisipa iha Ezame Nasional no Ezame Lokal hamutuk 1.785 estudantes, kompostu husi Ensinu Tékniku-Vokasionál, Sekundáriu Jerál no Ensinu Baziku klase nono.
Nia husu direjente eskola sira atu assume sira nia responsabilidade no tau matan didiak ba estudantes finalista, liuliu durante preparasaun ba ezame.
“Liu-liu ba finalista sira, atu nune’e bele hetan rezultadu ne’ebé diak iha Ezame Nasional tinan ida ne’e. Ita nia direjente eskola sira tenke asume knar ho responsabilidade, tau matan didiak ba ita nia oan sira no hatudu prestasaun servisu ne’ebé diak,” nia dehan.
Nia hateten katak, direjente eskola presiza servisu ho responsabilidade no maturidade atu organiza no jere eskola diak, tanba jestaun eskola importante atu apoia estudante sira no ajuda manorin sira hala’o sira nia responsabilidade.
“Oinsa tulun mos ita nia manorin sira nia responsabilidade atu bele hanorin ita nia estudante sira iha sala ho diak. Nee duni preparasaun husi eskola ba Ezame Nasional no Lokal, eskola sira hahú prepara an tiha ona,” nia katak.
Iha parte seluk, Superintendente Edukasaun Munisípiu Dili, Cesarina C. Guterres, informa katak estrutura inspesaun agora foun ona no sira sei simu orientasaun atu fó koñesimentu ba Inspesaun Jerál molok fó informasaun ruma, inklui kona-ba preparasaun ezame.
Enkuantu ne’e, Koordenadór Gabinete Unidade Kurríkulu Nasionál iha ME, Joao Mau Pelu, hatete katak dadus estudantes finalista husi eskola sira iha munisípiu hotu mai ona iha ME no agora tama iha faze verifikasaun.
Nia hateten katak, tanba prosesu verifikasaun dadus ne’e, preparasaun ba Ezame Nasional kontinua lao hela.
(jac)
