DILI, STLTIMORLESTE.com – Ministériu Edukasaun (ME) hatete katak la iha desizaun atu hapara kontratu profesores iha Munisípiu Manatuto, no Diresaun Nasionál Rekursu Umanu (DNRU) seidauk simu informasaun kona-ba kestaun terminasaun kontratu profesores sira iha área ne’e.
Diretor Nasionál Rekursu Umanu iha ME, Joao Amaral hato’o informasaun ne’e ba STL iha nia fatin servisu, Tersa-feira (29/09/2026).
“Kontratu ne’e hau ladún hatene, tanba hau seidauk iha informasaun. Ida ne’e kontratu parsial, tanba ami nunka hapara ema ida. Sira foin dadaun kontratu ho 1.499, nee mak nee. Ami seidauk hapara profesores,” nia afirma.
Enkuantu, Diretor Servisu Edukasaun Munisípiu (SEM) Manatuto esplika katak la’ós professores hotu-hotu mak termina, maibé kontratu manorin balun ne’ebé kontrata husi autoridade munisípiu remata ona iha fulan Setembru.
Nia hatete katak, manorin sira ne’e kontrata atu hanorin iha pre-eskolár no programa alfabetizasaun. Tanba orsamentu munisípiu la to’o atu kontinua kontratu sira, kestaun ne’e agora levanta ona ba autoridade finansas no Komisaun Funsaun Públika (KFP).
“Sira ne’e la’ós bolsa kandidatu, maibé sira kontratu husi autoridade munisípiu atu hanorin iha pre-eskolár no alfabetizasaun. Iha professor lubuk ida ne’ebé ita kontrata, no sira nian kontratu remata iha fulan Setembru tinan ne’e, tanba orsamentu la to’o atu responde sira hotu,” nia informa.
Nia akresenta katak manorin sira ne’e kontratu tinan-tinan, no balun servisu kleur ona. Nune’e, terminasaun kontratu ne’e la’ós tanba desizaun atu hapara manorin sira, maibé tanba orsamentu munisípiu la to’o atu estende kontratu sira.
(jac)
