DILI, STLTIMORLESTE.com – Tinan 2026 ne’e, Ministeriu Edukasaun (ME) laiha orsamentu sufisiente atu kobre atividade monitorizasaun ba implementasaun Programa Merenda Eskolar iha eskola sira iha munisípiu hotu.
Liafuan ne’e hato’o husi Xefi Departamentu Programa Merenda Eskolar iha ME, Belchior Maria Almeida Barros ba STL iha nia knaar fatin, Segunda (07/09/2026).
Nia hatete katak, tuir regra programa, menu merenda eskolar tenke tuir padraun ne’ebé determina ona, no kona-ba informasaun ne’ebé sai iha media sosial, nia sei halo komunikasaun ho Diretór Servisu Edukasaun Munisípiu Lautem atu konfirma informasaun ne’e.
“Hau hanoin tuir regra, menu ne’e labele grafe tebes ho hahán sira hanesan ne’e. Hau kontaktu tok lai ho Diretór Edukasaun Lautem atu nune’e bele konfirma asuntu ida ne’ebé iha media sosial, hodi ita bele hatene klean liu tan. ME ba tinan ne’e la iha orsamentu sufisiente atu kobre munisípiu hotu,” nia deklara.
Tuir Belchior, maski orsamentu limitadu, ME nafatin halo koordenasaun ho parte relevante sira, inklui Ministeriu Saúde (MS) no Ministeriu Administrasaun Estatal (MAE), atu monitoriza implementasaun Programa Merenda Eskolar iha eskola sira.
Nia esplika katak, iha implementasaun programa ne’e, fornesedór sira iha eskola ida-idak prepara hahán tuir menu merenda eskolar ne’ebé determina ona, ho objetivu atu garante estudante sira hetan hahán ne’ebé diak no nutrisaun sufisiente.
“Ita-nia fornesedór sira tein tuir menu merenda ne’ebé iha ona. Sira tenke prepara hahán ne’ebé diak ba ita-nia estudante sira, atu bele fó nutrisaun ba estudante sira iha eskola ida-idak,” nia haktuir.
Iha parte seluk, Diretór Servisu Edukasaun Munisípiu Lautem, Aníbal Fernandes, seidauk fó resposta kona-ba asuntu ne’e tanba okupadu ho servisu seluk.
Enkuantu Koordenadór Ensinu Baziku Filial (EBF) Marinir, Aureliano Maia, dehan implementasaun Programa Merenda Eskolar iha eskola ne’e lao normal. Estudante sira asesu ba programa ne’e ho diak, no fornesedór sira prepara hahán tuir menu ne’ebé determina ona.
“Ami-nia estudante sira asesu merenda eskolar ho diak, no fornesedór sira prepara hahán tuir menu ne’ebé iha ona. Kada loron, ami-nia estudante sira han modo fresku, naan, aifuan, susu ben no fore-mungu,” nia hatete.
Enkuantu estudante Dominca da Costa Moniz, dehan nia sente kontente tanba kada loron bele asesu Programa Merenda Eskolar. Nia hatete katak hahán ne’ebé sira hetan inklui etu, modo tahan, koto no aifuan.
“Dader ami mai eskola partisipa iha aula, depois mak tempu atu han merenda eskolar. Ami sente kontente tanba loroloron mai eskola ami bele han merenda, ne’ebé dala ruma iha naan, koto, modo tahan no seluk tan,” nia informa.
Nia aumenta katak, bainhira tempu merenda, ema ne’ebé prepara hahán entrega ba estudante sira. Estudante sira sai husi sala aula atu simu hahán, inklui aifuan hanesan hudi, apel no aifuan seluk, tuir hahán ne’ebé fornesedór prepara.
(jac)
